2788/2022-2023

Lunglei the 24^th November, 2022: Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' kaltlanga Branch YMA te tana Mizo hnam lam leh hnam zai hmanga intihsiakna chu Lunglei District tan naktuk (25^th November, 2022) chawhma dar 11 atangin Saikuti Hall-ah neih a ni dawn.

Hemi chungchangah hian Lunglei District Level Organising Committee on Zoram Harh Rawh chu vawiin chawhma dar 10 khan an Chairman Lunglei Additional DC Pu Donny Lalruatsanga hovin DC Conference Hall-ah an thukhawm.

He hunah hian hmalak tawh dante ngaihthlak niin, program neih dan tur kalhmangte leh HIV/AIDS chungchang inzirtirna zau zawk kalpui dan tur chungchangte sawiho a ni a. Thukhawm chuan Zoram Harh Rawh Campaign kaltlanga hnam lam leh zai intihsiakna chu a hawnna, awareness campaign leh hnam lam hmanga intihsiakna chu November ni 25, 2022 chawhma dar 11 atangin Saikuti Hall-ah neih ni se tih a rel a ni.

Mizo hnam lam intihsiakna turin Cheraw (Kantluang) leh Khuallam te thlan a ni a, hla hmanga intihsiakna turin Darmani Zai, Lianrikhumi Zai, Awithangpa Tlawh Zai, Labour V Force Zai leh Domangi Zai te zinga duh ber pakhat thlanga zai tur a ni dawn bawk a. Hla hi chang thum thleng sak tur niin, hemi zai thluk hmanga hla awmsa emaw, thupui HIV/AIDS dona lam hawia hla phuah chawp leh cheimawite hman phal a ni. He huna tel te tan hian HIV/AIDS Awareness Campaign leh mahni inhrechiang duhte tan thisen test neih theih a ni dawn a, Cable TV kaltlanga Live a pek chhuah tura ruahmanna siam a ni. Vawiin thlengin Zoram Harh Rawh Campaign intihsiaknaa tel tura inhriattir tawh YMA Branch pasarih (7) an awm a ni.

District Level-a ti thate tan State level intihsiakna December ni 1, 2022 hian neih tura ruahman a ni a. District bikah hian pakhatnain Rs. 50,000/-, pahnihnain Rs. 30,000/- leh pathumnain Rs.10,000/- te an dawng dawn a. Heng bakah hian Consolation Prize ruahman a ni bawk.

Zoram Harh Rawh Campaign-in a tum ber chu mipuite HIV/AIDS chungchang ngun taka zirtir a ni a. HIV laka inven dan leh inven nachang an lo hriata kan rama HIV a darh zel loh nana ruahman a ni a. Heng bakah hian a vei mekte'n enkawlna tha dawn a pawimawhzia an hriata, inenkawlna dawng tura inenkawlna hmun pan nachang an hriat theih nan te, HIV kai thei dinhmuna dingte'n an dinhmun dik tak an hriat theih nana thisen test-na hmun kawhhmuh leh mahni dinhmun inhriatchian pawimawhna leh thatnate zirtir a ni.