Vawiin Ni 20.5.2014 hian Agriculture Director Dr.C.Lalzarliana leh a hote chuan Lungleng khuaa NLUP hnuaia Fu ching hlawhtlingte hmalak dan enin an Fu chinna hmun an fangkual.

Lungleng khua hian hun rei tawh tak atang khan Fu hlawhtling takin an ching thin a, Aizawl khawpui Kurtai supply tu ber an ni thin a ni. Lungleng North bikah hian tunah chhungkaw 158 awmin chhungkaw 80-90 bawr velin Fu an ching a, NLUP hnuaiah chhungkaw 65 bawr velin Fu chin an hlawhtlinpui hle a ni. Lungleng-I ah pawh chhungkaw 164 atangin chhungkaw 60 bawr velin Fu an ching a, tin, NLUP hnuaiah chhungkaw 44 laiin Fu an hlawhtlinpui hle a ni.

Tuna NLUP hnuaia Fu chingtute zingah hian Fu chhuan 130-140 thar thei thahnem tak an awm a, Kurtai 63qtls. chuang Kum 1 a thar thei an awm nual tawh a ni. Lungleng-I atangin Pu Duhawma (VCP), Pu Lalthanpuia leh Pu Para te hi hlawhtling zual deuhte an ni a. Lungleng North ah hian Pu Lalchhuana (VCP), Pu Lalzawmliana, Pu Hmingthanga, Pu R.Kapthanga leh Pi Remi te chu hlawhtling zual deuhte an ni. Heng Fu ching hlawhtling te Fu huan Agriculture Director hian a hmunah a tlawhkual a, an hlawhtlinna leh thawhrimna ah Director chuan a lawmpui mai bakah chhuanawm a ti hle a ni. Fu chingtuten hian Agriculture Director hnenah an mamawhte an lo thlen a, Director chuan a theih anga tanpui zel a tum avangin an hlim hle. Hetianga Agriculture Director in an thlawhhma ahmu na a tlawh hi lawmawm an ti hle a ni.

Hemi ni vek chawhnu lamah Lungleng Community Hall ah Farmers Meet neih nghal a ni a, Fu atang hian Chini (Brown Sugar) siam na tur khawl Agriculture Department in ngaihtuah a tum dan Director in a hrilh a,loneitute chuan lawmawm an tiin an phur hle a ni.

Agriculture Director hi Pu H.Thankhuma, Joint Director (MMA), Dr.H.Saithantluanga, D.A.O, Aizawl ten an tawiawm a ni.

Attachment

  • Loading attachment...