Champhai District chhunga awm, Lungphunlian khua chuan Mizoram buailai a an khaw thenawm Hnahlan a India Sawrkarin an khua a khawm hnua mahni khaw buzawl an luah leh tan kum 1972 atanga mei mit lova an khaw din champhaphak kum 46-na pualin Ni 8-9, January 2018 chhung khan Lungphunlian Community Hall-ah "Lungphunlian Day" an hmang a, Bialtu MLA Pu T.T. Zothansanga chu he hunah hian khuallian a ni.
Pu TT Zothansanga chuan kum 46 lai Pathian hruainaa Lungphunlian a kal thei chu lawmawm a tih thu sawiin hmasawnnna chi hrang hrang, zirna sikul a zirtirtu indaihlohna awm thin pawh sutkian a nih theihnan Mizoram Sawrkarin theih tawp a chhuah zel tur thu a sawi a. Hmanlai pipute sulhnu tam tak awmna leh Mizo pipute luah hma a 'Mirawng' ho sulhnu, 'Lungphun' lian tak tak awmna Lungphunlian hi awlsam zawka zinmiten a kalpawh theih nan kawngpui lian tha tak laihna leh cheibawlna tur ruahmanna reilote ah Mizoram PWD ten an tihchhuah thuai tur thu a sawi a ni.
He hunah hian Pu H. Lalrammawia Branch Manager MRB Khawzawl Branch chu khualzahawm a ni bawk. Lungphunlian Day-ah hian an khaw thenawm, Hnahlan leh Tualcheng atang leh Mizoram khaw hrang hrang atangin Lungphunlian khaw chhuak mi thahnem tak an tel a, Lungphunlian History inhrilhhriatna leh sawihona hunte buatsaih a ni.
