Vawiin chawhnu dar 1 khan Information & Public Relations Department officer te chuan MJA hruaitu thar lawmna neiin, Pu Jim K. Chozah, Director, I & PR chuan inkhawm a kaihruai.

 

 

Pu Jim-a chuan, Journalist hotute lawm na thu sawiin, I &PR Department nen theihtawp chhuah a thawh hona nei thin an nih angin chhunzawm zel nise tih thu a sawi a, hmasawnna awm theihnan theih tawp chhuah zel ang u tiin MJA hruaitu tharte chu a sawm a. Minister I&PR hun remchang neih hun nghakin, MJA hruaitu tharte lawmna hi neih tum a ni a, mahse Minister chu ram tana pawimawh dangah a tul em avangin, a tel lovin lo hman phawt a, remchangah ama hova neih leh tum anih thu Pu Jim-a chuan a sawi bawk.

Pu Zosangliana, President, Mizoram Journalist Association (MJA) Hqr. chuan, I&PR officer ten anmahni lawm na an siam chu lawmthu sawiin sawrkar kal fuhlo tur ven nan chuan fuihna thu tha ziah zel a, a tihchhiat zawng ringawt nilo a siamtha zawngin kan thawkho ang tih a sawi.

Pu Zonunsanga Khiangte, MJA Treasurer chuan I&PR buatsaihin Communal Harmony Campaign neih thuai leh India ram fanna (Press Tour) bakah North East State dangte tlawhna hun siam turin rawtna, lawmthu sawi pahin a nei a, hemi chungchang hi DIPR lam chuan lo en thuai an tiam.

Pi Lalnithangi, Joint Director, I&PR chuan, tun hma kum tam tak kal tawh, hun harsat lai ber (buai lai) atangin thawhhona tha an lo neih thu chu chhunzawm zel nise, a ti. Pu David L. Thangliana, President, MISA pawhin thusawiin, I &PR leh MJA te chu sawrkar leh mipui beng leh ka, kut leh ke an nihna avangin, taimak, rinawmna leh chhelna nei chungin, ram siam kawngah mi tangkai nih theih nan thawkho zel ang tih a sawi.

Pu Robert Lalchhuana, Prominent Journalist leh Pu Lalbiakthanga Pachuau, Sr. Journalist pawhin thu an sawi a. MIS Officer thar 6 ten in hmelhriattirna hun an nei bawk.