Mizorama lei tihthatna (Fertilizers) dinhmun leh Mizoramin lei tihthatna a mamawh dan zir chiang tura lo kal Sawrkar Laipuia Parliamentary Standing Committee on Chemicals & Fertilizers member te chuan vawiin khan Aizawl an rawn thleng.

MP rual te rawn kalte hi an Chairman Shri Gopinath Munde, Lok Sabha M.P (Shiv Sena) in rawn hovin an vaiin mi 10 an ni a, Sawrkar Laipui atangin Officer lian 4 in an rawn tawiawm a ni.

MP rual te hian vawiin chhun dar 12:30 khan Lengpui Airport an rawn thlenga, Airport atang hian an thlenna tur a ruahman State Guest House pan pui an ni a, chhun chaw an eizawh hnuin vawiin tlai khan Sihphir Vengthar YMA Hall-ah loneitute nen inkawmna hun an hmang a, zanin hian State Guest House-ah an pualin cultural programme buatsaih a ni a, he cultural programme zawh hian Agriculture Minister Pu H.Liansailovan an puala zanriah a buatsaih chu an kilho ang. Ruahman lawk dan chuan MP rualte hian naktuk zing dar 9 ah State Guest House-ah vek hian Mizoram Sawrkar official pawimawhte nen inkawmhona hun an hmang ang a, hemi zawh hian Lengpui Airport ah kir lehin Guwahati pan turin Mizoram an chhuahsan ang.