No.1414/2020-2021

Vawiin chawhnu khan DC Conference Hall, Kolasib-ah Madhya Pradesh, Gujarat leh Karnataka atanga Mizoram mi leh sa lo haw turte dawnsawn dan tur relin Kolasib district chhunga sawrkar hnathawk mawhphurna hrang hrang neite an thukhawm a. Kolasib DC, Dr H.Lalthlangliana'n a kaihruai a ni.

Dr H.Lalthlangliana chuan Mizoram mi leh sa tangkhang lo haw te, Bairabi rel chawlhmun atanga an district theuh an pan dan tur ruahmanna tlangpui sawiin Zu rui motor khalh ah tumah an chuan tir dawn loh thu leh hemi tur hian uluk tak a motor khalhtu tur te pawh inhrilhhriat thin a nih thu a sawi. Kolasib district chhungah Quarantine Facility buatsaih hrang hrangah te mi 749 an awm theih thu a sawi a, hengah hian mi 190 an awm mek a, home quarantine awm miah lo a kalpui tum a nih thu a sawi bawk a.

Madhya Pradesh leh Gujarat phurtu rel hi zanin dar 10:00PM ah a lo thlen beisei a nih laiin thlipui leh leimin avangin an lo thlen hun tur tak hi hriat a ni lova, Karnataka atanga lo chhuak rel, naktuk zing dar 6:00AM a lo thleng tur ang a ngaih pawh darkar engemaw zatin a khawtlai rin a ni. Thlipui leh ruah te sur thut thei a nih avangin Bairabi rel chawlhmun pawh a tul anga thawmthat a ni a, ruah sur laia Screening kalpui theih a nih dawn loh avangin tangkhang lo haw te chuan rel chhungah an lo nghak mai dawn a ni. Bairabi rel chawlhmun paltlang a Tripura mi leh sa, tangkhang, Agartala pana chuang tlang tur engmaw zat an awm dawn a, anni pawh hi Bairabi rel chawlhmunah hian eitur pek an ni dawn a. Bus convoy inzui a thui deuh dawn avangin Officer escort turte ruat belh nghal an ni a, kawng lak-ah hrisel lohna avang emaw loh theihlohna engemaw vang a nih loh chuan, bus atanga chhuak tumah awm lo turin an vil dawn a ni.

Madhya Pradesh leh Gujarat tan bus 32 leh Karnataka atang lo haw tur phurh nan bus 81 ruahman a ni.