No.1454/2020-2021

Tukin zing dar 4:30 khan Karnataka atanga Mizoram mi leh sa tangkhang, Shramik Train hmanga lo haw, mi 1452 te chuan Bairabi rel chawlhhmun an lo thleng a, Madhya Pradesh leh Gujarat atanga lo chhuakte pawhin chhun dar 12:50 khan rel chawlhhmun hi an lo thleng ve bawk a ni. Dr H. Lalthlangliana, Deputy commissioner, Pu Vanlalfaka Ralte, SP leh Kolasib district thuneitu, tangkhang te dawnsawnna kawnga mawhphurna hrang hrang nei ten an lo hmuak a ni.

Rel in Bairabi an lo thlen rual hian rel chhungah ei leh in pek an ni a, Screening point 10 kaltlang a endik vek an nih hnuah an district theuh panna tur bus ah luh tir nghal an ni. Bus hian Station a chhuahsan hnu hian Liason Officer te kaihhruaina hnuaiah an hawna tur district theuh, bus 124 hmangin pan tir an ni.

Vawiina Karnataka atanga lo haw te hi an vaiin mi 1452 an ni a. Aizawl district mi 476, Lunglei district mi 279, Serchhip district mi 50, Kolasib district mi 51, Champhai district mi 90, Siaha district mi 134, Mamit district mi 128, Lawngtlai district mi 178, Saitual district mi 30, Khawzawl district mi 24 leh Hnathial district mi 12 an tel a ni.

Karnataka atanga lo haw te phurtu relin Bairabi rel chawlhhmun a chhuahsan hnu hian Gujarat leh Madhya Pradesh atanga lo hawte phurtu rel hian chhun dar 12:50 khan bairabi rel chawlhhmun hi a rawn thleng veleh a, an lo thlen rual hian rel chhungah ei leh in pek an ni a, he thu buatsaih lai hian Screening point 10 kaltlang a endik mek an ni.

Gujarat atanga lo haw te hi mi 289 leh Madhya Pradesh atanga lo haw te hi mi 223 niin an rawn chhuah dawnah chhinchhiah an ni a, Bairabi rel stationah chhiar nawn leh tur niin a rawn thleng zat hi he thu buatsaih lai hian hriat hman a ni rihlo a ni.

Kolasib district thuneitute ruahmanna in District hrang hrang a mi te hi Liason Officer ruat bik theuh ten an lo buaipui a, kawng laka harsatna a awmloh nan escort te nen Kolasib district ramri chin thleng an thlah vek bawk a ni. Rel chawlhhmun hmanga lo haw te sulhnu hi Sanitation team ten fimkhur tak leh tha takin an senghawi a ni.