938/2023-2024

Aizawl The 27th June 2023: Information & Public Relations Department leh Mizoram Art Development Society (MADS) tangkawp buatsaih ‘MADS Annual Art Workshop cum Seminar’; June ni-27 atanga ni-30 thleng awh tur chu vawiin khan Aizawl Art Gallery Khatla-ah hawn a ni a. He hunah hian I&PR Joint Director Pu F. Lalfakzuala chuan khuallian niin he workshop hi a hawng a ni.

Pu F. Lalfakzuala chuan art tih hmasawn nan leh tihchangtlun nana MADS hmalaknate chu fakawm a tih thu a sawi a, kum-10 chuang an kai chho thei ta chu a lawmpui hle tiin hruaitute leh member-te inpekna a ni a ti. Khuallian chuan pawl din satliah chu thil harsa lo te a ni a ti a, a taka kalpui erawh thil namai lo tak a ni tiin MADS hruaitute taimakna leh thahnemngaihna chu fakawm a tih thu a sawi. Mizo zingah artist thiam tak tak inphum ru an awm teuh a rin thu sawiin artist-te zawnchhuaha tihhmasawn na tura MADS a ding chu ropui a tih thu a sawi bawk.

Pu F. Lalfakzuala chuan lemziak mite chu mi bik, mi zawng zawngin an tih theih loh ‘rohlu’ nei an ni a ti a, an thiamnate chu ti pung zual zel tur leh hma sawn zel turin a chah a ni. Artist-te lemziah leh lemtuk mawi tak te chuan ngaituahna ti kalthui thei hlein, mi lungngaite hlimna thlen theitu an ni tih hre reng tura chahin, lemziak thiamte chu hmasawnna thlentu leh hnam ziarang humhalhtu an nih zel theih nan duhsakna a hlan nghal a ni.

Vawiina MADS Annual Art Workshop cum Seminar hawnna inkhawm hi Pu Vanlalhriata, President, Mizoram Art Development Society chuan a kaihruai a, Pu V Lalzawmkima, General Secretary hnen atangin report tawi ngaihthlak a ni a. Hawnna inkhawmah hian Aizawl khawchhung mai bakah Mizoram hmun hrang hrang atangin member 64 an kalkhawm a ni. Chawhnu-ah seminar in chhunzawm nghalin; Master of fine Arts (Sculpting) Pu Andrew Lalremruata leh Master of Fine Arts (Painting) Pu Isaac Malsawmtluanga-te hnen atangin sculpting leh painting chungchang inhrilhhriatna hun hman a ni bawk.