Mizoram State Agriculture, Horticulture and Marketing Co-operative Federation (MAHFED)  Ltd. hmalakna tur leh ruahmanna tur sawihona leh Training Programme chu Ramhlun Indoor Stadium-ah neih a ni a, Co-operation Minister Pu C.Lalrinsanga chu khuallian niin, he hun hi a hawng nghal a ni. MAHFED Ltd. Chairman Pu Vanlalruata chuan Training Programme hi a kaihruai a ni.

Khuallian Pu C.Lalrinsanga chuan MAHFED Ltd hi thang khat liana rei a ding tawh a, Mizoram-ah a dinhmun hi hriat a ni a, kalphung thar, rahbi thar mamawh a ni, tiin a sawi a. Mizoram mipui za zela 60 chuang hi lo nei a enzawng an ni a, thlai thar hralhchhuah dan kalphung pawh ennawn ngai niin, sawrkar pawhin hma a la mek zel a ni, a ti a. Minister Pu C.Lalrinsanga chuan Organic Farming lamah Mizo ten tan lak a ngai a, thar tlemah man tam zawk leh hlawk zawkin a hralh theih a, hei bakah hian thlai tharchhuah te hi sawngbawl lova hralh hian a man a san theihloh avangin Food Processing thiam mamawh tak zet a ni a, thalaite hetiang kawnga pet chhuak zel turin a sawm bawk a ni.

Training Programme-ah hian District tin atangin lo neitute an kal khawm a, Dr. J.Daizova, Management Department, MZU chuan ‘Innovative and Pragmatic Ideas on Adaptable Development Approach’ tih thupui a hmangin kalkhawmte training a pe a, training kal zawng zawng te’n thupui behchhanin sawihona hun an hmang bawk a; MAHFED Ltd. Vice Chairman Pu C.Lalchhunga chuan lawmthu sawina neiin, he hun hi a khar a ni.