No.1688/2021-2022

Kolasib Dated 4th August 2021 : Vawiin khan Dr. H. Lalthlangliana, Deputy Commissioner Kolasib chuan ramri a buaina thleng avanga National Highway 306 danchah a nih avanga Kolasib District chhunga POL rualkhai zawka semchhuahna kalpui dan leh ramri chungchangah Kolasib District a thuthar la khawmtute a kawm. 
    
Dr. H. Lalthlangliana chuan sawrkawr hnathawkte, Executive Duty on COVID-19-te bakah hnathawh nana POL mamawhte chu inrualkhai taka an mamawh ang an dawn theuh theih nan thlei bik awm lova semchhuah a nih mek thu a sawi a, “Hnathawh nana POL mamawhte chuan an veng VC-te kaltlangin DC Office-ah dilna an rawn thehlut reng thei a ni” a ti bawk. POL semchhuahna kawngah hri inkaidarhna a thlen loh nan Kolasib khawchhung veng hrang hrangte chu POL lak hun leh ni bithliah sak niin Kolasib khaw pawn lamte pawh a remchan dana lak hunbi ruahman sak tur a nih thu Dr. H. Lalthlangliana chuan a sawi bawk a ni. POL Permit hi Vairengte khawchhung bik tan SDO (Civil) Vairengtein a pechhuak anga, Bairabi SDC Office-ah Bairabi khawchhung a POL dilna chu thehluh tur a ni. Rualkhai leh indaihzai zawka Kolasib District-a POL-te chu hman a nih theih nan DC chuan mahni mamawh bak dilna thehlut lo turin leh mahni kawlsa pawh ren taka hmang thiam turin mipuite a chah bawk a ni. “Mahni hmasiala midangte ngaihtuah lova POL, buhfai leh bungraw hrang hrang leikhawlna thleng lo turin ka duh a ni” a ti a. Tuna Kolasib District-a POL awm dan dinhmun enin harsatna awm lova thlakhat chhung daih POL awm tura ngaih a nih thu a tarlang bawk a ni.

Ramri chungchanga hmalakna thenkhat tarlangin Kolasib DC chuan mipui zingah Social Media hmang fimkhur tura kan inchahnate chuan rah tha a chhuah meka a ngaih thu a sawi. Thu belh chian dawl lo leh kan Police Duty-te dinhmun tiderthawng zawnga thu vawrh darh awm lo se a duh thu a sawi a, Kolasib District chhung ramri hrul a Duty-na hmunte chu ‘No Drone Zone’ a puan a nih tawh avangin DC Kolasib phalna tel lo chuan Drone hmanga thlalak leh Video lakte khap tlat a nih thu a tarlang bawk a ni. 

Ramri a buaina thleng avangte leh kawng dan chah avanga harsatna thleng thei hrang hrang karah Dr. H. Lalthlangliana chuan hrileng laka fimkhur kawngah inthlahdah lo turin mipui a chah a, mimal tin atangin fimkhurna chu intan tur a nih thu a sawi bawk a ni.


Attachment

  • Loading attachment...