A bial chhung fanga zin kual mek Home Minister Pu R. Lalzirliana chuan nimin January 28 khan Saituala Govt. Primary School I, SSA Model School ramchhungah zirtirtute khualbuk sak tanna tur lungphum a phum a. Hemi ni vek chawhnu hian Tualbung khawtlang huaihawt, sorkar thar lawmna Tahreuh kawna neihah FCS & CA Minister Pu John Rotluangliana leh Chalfilh contituency bialtu MLA, MAMCO Chairman nibawk Dr. Ngurdingliana te nen an tel nghal a ni. Home Minister hi January 27 khan Keifang khawtlang buatsaih sorkar thar lawmna programme Keifang Community hall a neihah a lo tel tawh bak a ni.
Nimin zing khan Zirtirtute Khualbuk lungphum programme ah Home Minister chuan sorkar mi leh sa, mahni hna thawh leh eizawnna ngaihthah si NGO leh pawl thenkhata inhmang tam ta lutuk chu hna in a tuar a chu chu sorkar in tha a ti lo a ni, a ti. Political party a inhmang ni awma lang sorkar hnathawkte phei chu hriatchhuah an nih chuan an phu tawka hrem an nih tur thu a sawi a. Sorkar hnathawk tan chuan sorkar hna chu a ei bel anih mai piah lamah a rawngbawlna pawimawh ber a ni tih a hriat fo a ngai a ni a ti.
Hemi ni vek chawhnua Tualbung khawtlang huaihawt sorkar thar lawmna hunah Home Minister chuan thusawiina hun a nei leh a. He hunah hian bialchhung hmasawnna sulsutu atan bialtu MLA leh bial chhung mipuite thawhhona a pawimawh ber thu sawiin democracy ah chuan sorkar leh eng pawl pawh nise thawhhona tel lo chuan pawl hlawhtling leh thil ti thei an ni ngai lo a ni, a ti. Tun hnaiah kan thalai tam tak zu chhe in vanga rang taka an thi zung zung mai chu a manganthlak thu a sawi a. MLTP Act siam danglam chu a tul tawh a, zu in lo thei lo dinhmuna awmte tan pawh zu thianghlim lei tur a awm a hun tawh takzet a ni a ti. Kan nihna anga lanchhuah a hun a, zu hmunah pawh zu in lo chuan a in duh lo ngam a ngai a. Eiru duh lo tan pawh eiruk tur awmna hmunah an rinawm tlat chuan Mizoram chu ram hmasawn, ram zahawm leh miten chenna a tana an awh a ni dawn a ni a ti.
Sorkar thar lawmna huna thusawitu dang Pu John Rotluangliana, FCS & CA Minister chuan mirethei leh chhumchhiate thleng phak NLUP chu sorkar tharah pawh chak taka kalpui chhoh zel a ni ang a ti a. Zoram leilung hausakna te pawh hmuhchhuah a ni ta zel a, a chhunga cheng zofaten kan inzir phawt chuan zoram hmalam hun hi a eng hle a ni a ti. Tun hmain state dangah leilung hausakna laih chhuah a lo ni tawh thin a, chung state te chuan 12% chauh an chang thin a, Mizoram chhungah erawh chuan leilung hausakna haichhuah a nih hunah state chan tur 50% anih theih nan hmalak mek a ni, a ti. Tun hnaiah misual ten mizo tlangval 2 leh Deep Mondal-a te an rukbo chhanchhuahna kawngah khan Mizoram sorkar leh Home Minister rintlak takte hian fak an phu a ni a ti.
Chalfilh bialtu MLA, MAMCO Chairman nibawk Dr. Ngurdingliana pawhin thusawiin mirethei chhawmdawlna leh chawikan chu tun sorkar thar thil tum lian ber a ni a. A ma mimal hmalakna atana a chhawpchhuah zingah zirna, hriselna leh inkalpawhna kawng sial that te chu a dah pawimawh hmasak tur thu a sawi a ni. Sorkar thar lawmna programme Tualbung khuaa neih takah hian bialtu MLA Dr. Ngurdingliana chuan BNRGSK building chu Tualbung khuaa mikhual thleng thin te leh sorkar mi pawimawh theng thin te riahna tur inpection bangla atana chei a ni ang, a ti a ni.
Home Minister Pu R. Lalzirliana’n khawtlang mamawha hman atan computer set 1 YMA hotute kutah a hlan a, Rs. 3 lakh Tualbung Community hall chei nan a ruahman sak bawk a ni.Pu John Rotluangliana pawhin Tualbung khawtlang mamawha hman a tan sum fai Rs. 5000/- bakah football, volleyball leh volleyball net te leh silpauline bundle 1 a pe bawk.
