Vawiin chawhma dar 11 khan State Guest House Conference Hall-ah MZU UGC-Women Studies Centre leh Incubation Centre tangkawp buatsaih chawlhkar khat awh tur Workshop on Entrepreneurship Development tan a ni a. Mizoram Youth Commission Chairman, Pu Joseph Lalhimpuia chu Khuallian a ni.
Pu Joseph Lalhimpuia chuan workshop hawnna inkhawmah hian thusawiin Mizo hmeichhiate tana eizawnna kawng inkawhhmuhna tur workshop buatsaih a ni chu lawmawm a tih thu a sawi a. Mahni kea ding chhuak turin lehkha zir san leh kum lama upat kher a ngai lova, tei rei peihna, intodelh tumna, risk lak ngamna leh insiam rem theihna neih a ngai a ni, a ti a. India Entrepreneur langsar berte zing ami Dhirubai Ambani pawh pawl 10 pass chauh a ni tiin workshop a telte chu inpekna thuk tak nen bul tan turin a fuih a ni. Pu Joseph Lalhimpuia chuan Mizo hmeichhiate hian eizawn nan huaisenna leh theihna an nei tha a, tun dinhmunah pawh hian sawrkar office, market leh eizawnna hrang hrangah mipa aiin hmeichhiate hi hmuh tur an tam a ni, a ti. Sawrkarin a thunun phak loh sum leh pai lakluhna neih hi a pawimawh a ni, tiin kuthnathawkte khaichhuahna atana duan NLUP-ah pawh hmeichhia ten chanvo tha tak an chang a ni, a ti bawk.
Workshop hawnna inkhawm Prof Lalneihzovi kaihhruai-ah hian MZU Vice Chancellor charge la mektu Prof Lianzela pawhin thu sawiin entrepreneurship-ah chuan tualchhung mai ni lovin khawvel pum kan inkal pawh zung zung tawh avangin ramdang nena khaikhin pawha chhuanawm khawpa thiltih a tul thu a sawi a. Mizote hi thil thiam zul, thiam tak tak nei lo kan ni thin a, tunah chuan thiam bik neih a, khawvel ramdang thlira in elna rilru neih a tul a ni, a ti bawk.
He workshop-ah hian Commerce & Industry Department hotute, Mizoram University a mithiamte, mimal sumdawnna leh hnathawhnaa mi hlawhtlingten zirtirna an pe dawn a ni.
