Vawiin  khan Health Directorate Conference Hall, Dinthar-ah Malaria chungchang sawihona, Chief Medical Officers leh Christian Medical Asssociation of India, New Delhi te nen neih ani.
He meeting hi Dr. Ramfangzauva,  Dy. Director(Malaria) in a kaihruai a,thu sawiin Dr. Zauva chuan tunkum July thla thlenga Mizoram pum a Malaria dinhmun chu Mi 15857 thisen exam tawh aniin Malaria vei Positive 7930 hmuhchhuah ani a, heng zinga mi 17 te'n an thih pui ani a ti. Malaria vei nia inrinhlelhna nei chuan a rang lama thisen test neih ngei nise tih a sawi. Dr.C.Lalthanmawia, Director of Health Services charge la mek tu chuan keynote address pe in Malaria dona atana hma anlo lak tawh dan a sawiin Malaria avanga thi kan la tam hle thu leh hemi ti tlem tur hian nasa taka hmalak mek anih thu a sawi bawk. Heng kawng hrang hranga sawrkar hmalakna te ti hlawhtling tur chuan mipuite tawiawmna leh thuawihna a pawimawh ani ati. He tih lai hian thawktu te pawhin thahnem ngai leh zuala hma kan lak a tul thu sawiin Malaria do hneh tak tak tur chuan a bul thut atanga kan beih angai ani ati.

He meeting rawn hmanpui tur hian Central lam atangin mithiam 3 an rawn kal a, District tina Chief Medical Officers te bakah Malaria lama hotute te an tel tha hle a, he hun ah hian Malaria do nana an hmalak dan hrang hrang te tarlan anih hnuah hmathar lak dan tur tha zawk an hriatte sawihona neih zui nghal tur ani bawk. Meeting hian ni 15.9.2010 thleng a awh dawn ani.