No.4160/2020-2021

Mamit 17th August, 2020 : Vawiin khan DC Conference Hall, Mamit-ah Ni 24-28 August, 2020 chhunga neih tur National Deworming Day (NDD) Week hman dan tur relin District Level Coordination Committee chu thutkhawm a ni a. Dr. Lalrozama, IAS, Chairman DLCC/ District Bawrhsap chuan Meeting hi a kaihhruai.

Meeting hian NDD Week hawnna hun hi Ni 24 August, 2020 zing dar 10-ah DC Complex-ah neih nise tiin a rel a. NDD Week-ah hian Rulhuthlo (Albendazole Tablet) hi naupang kum 1 atanga kum 19-te hnena pek tura ruahman niin Mamit District chhungah mi 31079 target an ni a. COVID-19 hrileng mek avangin School, Anganwadi etc hawn theih a ni lova, hei vang hian Rulhuthlo hi Mamit District chhunga ASHA-te chuan in tina kal chilha pek tura ruahmanna siam a ni a. Mamit District chhunga ASHA awm lohna khua khaw 21-ah erawh Zirtirtu leh Anganwadi Workers tangkawpa pek nise tih a ni. Damdawi semtu tur ASHA te hian Face Mask leh Hand Sanitizer tha taka hmang tura tih niin in chhunga lut kher lovin kawngkhar atanga damdawi hi inpek mai nise tih a ni bawk.

Rulhuthlo (Albendazole Tablet) hi naupang kum 1-2 te tan mum chanve (200mg) a pek tur niin damdawi mum chanve chu thirfian hmanga tisawmin tui thianghlim nen chawhpawlha pek tur a ni a. Kum 2-3 te hi mum khat (400mg) a pek tur niin damdawi mum khat chu thirfian hmanga tisawmin tui thianghlim nen chawhpawlha pek tur a ni a. Kum 3-19 inkar chu mum khat (400mg) a pek tur niin damdawi chu sehsawmtir tur a ni thung a, damdawi ei zawh hnuah tui thianghlim intir ngei ngei tur a ni. Naupang damlo emaw damdawi ei lai nei chu Rulhuthlo hi pek loh tur a ni.

Meeting hian NDD Week chhunga ASHA te'n damdawi an pek chhuah dan report kimchang hi Chief Medical Officer (CMO), Mamit hnenah pek leh nise tih a ni a. He Week chhung hian mipui vantlangte zirtirna khawtin/vengtin tlangau kaltlanga neih nise tih a ni bawk.

National Deworming Day hi kumin February thla khan lo kalpui tawh niin mi 28208 target atangin 94.72% Achieved a ni a. Hemi tum hian West Phaileng Block huam chhungah Rulhuthlo ei an tlem ber avangin tun tumah hian abik takin West Phaileng Block chu tan la nasa tura ngen an ni.

Meeting-ah hian District Level Coordination Committee Members-te an tel tha hle a ni.

 

Attachment

  • Loading attachment...