No.1659/2020-2021

Mamit 4th June, 2020 : Vawiin khan DC Conference Hall, Mamit-ah District Level Task Force on COVID-19 chu Dr. Lalrozama, IAS, District Bawrhsap/ Chairman, District Level Task Force on COVID-19 hovin thutkhawm a ni a. Mamit District chhungah COVID-19 vei, rampawn atanga rawn haw te zing ami hmuhchhuah anih avangin hmalak zel dan tur ngaihtuaha thutkhawm a ni.

Meeting-ah hian Mamit District chhunga Quarantine Center zawng zawng leh a compound area-te chu tumah kal phal loh bur nise tih a ni a. Eng emaw vanga tul bik thil a awm anih chuan DC leh VLTF phalna la hmasain, Quarantine facility-a Security Duty-te kaltlangin khunghrante hi loh theih lova an mamawh zual pek theih a ni ang.

Meeting hian Mamit District chhungah COVID-19 vei hmuhchhuah an awm tak avangin tun atangin loh theih lohah chauh lo chuan pawn chhuak lo tur leh pawn chhuakte pawhin Mask vuah ngei ngei nise a ti a. Hei bakah hian Social Distancing nasa lehzuala ngaipawimawh turin District chhung mipuite a ngen a. Mask vuah lova pawn chhuak leh Social Distancing ngaipawimawh lo-te chu Police Flying Squad Duty mai bakah vengtina VLTF Duty te'n dan pawisa lo chu khauh lehzuala hmalain pawisa an chawitir zel dawn a ni.

Tuna COVID-19 Case kan neih hi tualchhung atanga inkai darh a ni lova, Mizoram pawn, Delhi atanga tangkhang rawn haw khunghran lai atanga hmuhchhuah niin a tirte atanga fimkhur leh uluk taka chhui zui anih avangin District chhung mipuite tan chi-aina tur a awm lova, a chenpuite zawng zawng leh a kiang vela awmte pawh hri an kai leh kai loh chhui anih thu CMO leh District Medical Superintendent hnen atangin ngaihthlak a ni.

COVID-19 vei hmuhchhuah hi tukin khan Zoram Medical College-ah Ambulance hmanga phurh chhoh a ni a. An phurh chhohna Ambulance hi damdawi hmanga Sanitize vek niin a thlen chhoh hunah pawh uluk taka Sanitize leh vek tur a ni a. Ambulance mamawh, hmang lehzel tur tan pawh hlauhthawnna tur a awm loh thu Medical hotute hian an sawi bawk a ni.

Vawiin thutkhawmah hian khawpui chhung VLTF Chairman leh an aiawhte bakah Members dangte an tel tha hle a ni.