No.2291/2020-2020

Mamit 22nd June, 2020 : Vawiin khan DC Conference Hall Mamit-ah Dr. Lalrozama, IAS, District Bawrhsap, Chairman DLTF Mamit hovin District Level Task Force on COVID-19 thutkhawm a ni a. Mamit District-a Lockdown thawh sarihna kalpui dan turah ruahmanna siam a ni.

District Bawrhsap chuan hrileng avanga ramri veng duty-na a chesual Upa Lalpianvula, Zawlnuam Bawrai vengin Dt 19.06.2020-a a chetsualna tuar lova a nunna a chan ta chu pawi a tih thu a sawi a. Meeting tura kalkhawmte hian ngawirenga dingin amah sunna hun an hmang a ni.

Meeting-ah hian Mamit khawpui chhunga dawr hawn loh ni tur ruahmanna siam niin Thawhtanni, Thawhlehni, Ningani leh Zirtawpni-ah te dawr hawn khap nise tih a ni a. Tul bik thilah chuan DC leh VLTF-te remtihna la hmasain dawr hi hawn theih a ni anga, hei bakah Damdawi chauh zawrhna dawr bik chu nitin inhawn theih a ni ang. Dawr hi tlai dar 5:00 thleng chauh hawn phal a ni. Mamit khawpui chhung nilo, khawpui pawna dawrte erawh nitin inhawn phalsak an ni.

Lockdown chhung hian zan dar 7:30 atanga zing dar 4:30 inkarah mipuite pawn chhuah khap tlat a ni a. Mamit khawpui chhunga mite, lo leh huan lama hnathawk duhte tan VLTF remtihnain thawh phal a ni a. Feh turte chuan zing dar 4:30 atanga zing dar 7:00 inkarah khawpui an chhuahsan fel hman tur a ni a, tlai dar 5:00 atanga dar 7:30 inkarah an haw leh tur a ni. Mamit tih loh khaw dang zawngah erawh chuan huan lo ram hnathawh chungchangah khuahkhirhna a awm lo ang. Mamit District chhunga Quarantine Centre, Covid Care Centre (CCC) leh Dedicated Covid Health Centre (DCHC) Compound leh a bul hnaia kal khap tlat a ni bawk.

Heng tarlan bakah hian Lockdown hmasa, thawh rukna-a Mamit DC Office atanga lehkha chhuak No. B. 13018/2/2020 - DC (M)/ DMR-COVID19 Dt.10th June, 2020-in Mamit District chhunga Total Lockdown kalpui dan tur a lo tihchhuah tawh anga kalpui leh vek tur a ni ang.

Vawiin thutkhawmah hian DLTF Members-te an tel tha hle a ni.