No.3401/2019-2020

Vawiin khan DC Conference Hall, Mamit-ah Dr. Lalrozama, IAS, District Bawrhsap/ Chairman District Level Task Force On COVID-19 hovin Coronavirus hrileng mek avanga India ram puma Lockdown kalpui mekah Mamit District chhung ei leh bar chungchang bakah hrileng laka kan him zel dan tur thlirho-a thutkhawm a ni.

Meeting-ah hian Mamit District-in thlaihnah chungchangah surplus nei lo mahse hmun hla tak atanga lak luh ngai lovin Mamit khaw chhehvel Darlak, Bawngva, Dampui, Phaizau khua, thlaithar zuar association atangin hun eng emaw chen chu mipui mamawh an phuhruk theih beisei a nih thu tarlan a ni a. Heng chawhmeh inhlanchhawn chungchang leh mipuite hnena hralh chhuah chungchangah hian VLTF te chu tha an tih dan leh a remchan ang anga hmala tura tih an ni a. Hei bakah hian Bazar hawng lova nitin mamawh Buhfai, Dal, Tel, etc. mipuite'n an tlakchham lohna turin leh awmze nei taka hralh anih theih nan VLTF ruahmanna anga kalpui chhunzawm rel a ni a. Mipuite chu pawn chhuak lo hram hram tura ngen an ni.

Vawiin Meeting hian Mamit Petrol pump-in lockdown chhunga free sale anga kalpui lova, permit nei leh Official mamawh zualte tan chauh an pe chhuak thin chu chhunzawm zel tura tiin zing Dar 9:00 atanga Chhun Dar 12 thleng inhawng thin tura ruahman a ni.

Vawiin thutkhawmah hian Lockdown avanga Mamit District chhunga chhuanchhama awm in-report te dinhmun thlithlai tur leh chhawmdawl dan tura ruahmanna lo siam turin DCSO, Mamit chu ruat a ni bawk.

Meeting-ah hian Mamit Khawpui chhunga dawr lian zual 11- a nitin mamawh chhekkhawl tlangpui zirchianna atanga kan dinhmun ngaihthlak a ni a. Tunah hian Buhfai 5225 kgs, Dal 140 kg, leh Tel 636 Litres chhekkhawl a ni a, CL Filling Station-ah Petrol 14000 litres leh Diesel 12000 litres a la awm bawk a ni.

Vawiin Meeting-ah hian DLTF On COVID-19 Members-te an tel a ni.