No.173/2020-2021

Vawiin khan DC Conference Hall, Mamit-ah Dr. Lalrozama, IAS, District Bawrhsap/ Chairman District Level Task Force On Covid-19 hovin khawvel puma hrileng mek Novel Coronavirus laka Mamit District himna tur leh Lockdown neih mek avanga mipuite ei leh bara an harsat lohna tur bakah District mipuite zawm tur khuahkhirhna dan siama thutkhawm a ni.

Meeting-ah hian Lockdown kalpui laia lirthei tlan tih tlem dan tur ngaihtuahho niin huan leh lo lama kal duhte tan pawh ramhnuai lama an awm theih chin mumal taka ruahman a ni a. Feh turte chu Zing dar 9:30 hmain chhuak vek tur leh feh haw turte chu tlai dar 5:30 hma ngeia haw hman ngei ngei turin hun bi siam a ni a. Hei bakah hian District chhung mipuite'n ei leh bara harsatna kan tawh lohna turin tunkar Ni 9.4.2020 (Ningani) hian khawdang atangin Wholesale dawrah an mamawh dawr bungrua chi hrang hrang rawn lak phalsak an ni a. Hemi ni vek hian zing dar 6 atanga tlai dar 6 thleng mipui mamawh lamna hun siam tura rel niin mipui dawra mamawh hrang hrang lamte hian Mask vuah hram nise tih a ni a. Hei bakah hian Social Distancing ngaipawimawh a, inhnaih lutuka awm lo turin DLTF chuan mipuite min ngen a ni.

Vawiin DLTF Meeting hian Mamit khawpui chhung hrileng laka a him theih nan Mamit khaw luhna leh chhuahna-te tun aia nasa zawka venhim nise a ti a. Heng luhna leh chhuahna-ah te hian Sub.Hqrs YMA hmalaknain tlaivar-a duty thin nise tih a ni bawk.

Vawiin vek hian VLTF parukte hnenah Sorkar atanga tanpuina pawisa Rs 5000/- leh Mask eng emaw zat hlan an ni a. He tanpuina hi Mamit District chhunga VLTF zawng zawng pek vek tur niin an bialtu BDO kaltlanga pek tura ruahmanna siam a ni.

Vawiin thutkhawmah hian DLTF Members-te an tel tha hle a ni.