No.3232/2019-2020

Vawiin khan DC Conference Hall Mamit-ah Dr. Lalrozama, District Bawrhsap/Chairman, District Level Task Force On COVID-19 kaihhruainain Novel Coronavirus laka Mamit District himna tura hmalak zel dan tur leh hmalakna kal mekte thlirho a thutkhawm a ni.

Meeting hian COVID-19 laka District chhung mipuite kan himna turin vawiin Ni 23/3/2020 atanga naktuk Ni 24/3/2020, Zing Dar 9 thleng nitin mamawh zuar dawr leh Bazar-a chawhmeh zuarte tan inhawn theih hun a siam a, hemi hnu atang chuan Ni 29/3/2020 (Sunday) thleng dawr zawng zawng leh chawhmeh zuar Bazar-a thute pawh inhawn leh inzawrh remtih a ni tawh dawn lova, khap bur anih tawh dawn avangin mipuite ei leh bara kan buai lohna turin mamawh inlamkhawm nise tih a ni a. Damdawi In leh Damdawi dawrte erawh fimkhur takin an inhawng thei anga, Essential Service tuichawite chuan DC atanga phalna lain an hna an chhunzawm thei ang.

Vawiin Meeting hian Village Level Task Force kaihhruainain Village Level Operation Centre din nise a ti a. Mamit District chhunga lo lut reng rengte chu Village Level Task Force-in chhinchhiah a, nitin DC Office-a report thehlut thin tura rel a ni a. COVID-19 chungchanga Duty-te tan ID Card, DC Office atanga siam nise tih ni bawkin hei bakah hian District Emergency Operation Centre (DEOC) DC Complex a mi pawh hman theiha peihfel anih tawh thu Meeting-ah hian tarlan a ni bawk.

Meeting hian COVID-19 avanga lockdown neih chhungin veng chhungah mamawh bik leh harsatna nei kan awm anih chuan mahni awmna theuh Village Level Task Force te berawn thin tura mipuite chahin hei bakah hian taksa lama harsatna nei kan awm anih chuan Phone No. 9612467068-ah hian damdawi In pan kher ngai lovin mithiam rawn theih a ni bawk ang. Mamit District mipuite chu Sorkar thu zawm a, pung khawm lova, pawn chhuak lo tur leh mahni in theuha awm turin Meeting chuan a ngen nghal bawk.

Vawiin Meeting-ah hian District Level Task Force On COVID-19 Members-te an tel tha hle a ni.