No.3610/2020-2020

Mamit 30th July, 2020 : Vawiin khan DC Conference Hall, Mamit-ah Dr. Lalrozama, IAS, District Bawrhsap hovin Mamit-a Independence Day, 2020 hman dan tur relin thutkhawm a ni.

Meeting kaihruaitu Dr. Lalrozama chuan kumin Independence Day chu Covid-19 hrileng mek avangin kum dang anga hman theih a ni dawn lova. Sorkar thuneitute ruahman angin a tlem thei ang bera kalkhawm a, a theih anga urhsuna hman nise ti-a ruahmanna siam a ni a ti.

Meeting chuan kumin I-Day chu DC Complex kawtzawlah khuallian Hon'ble Minister Pu Lalchhandama Ralte, School Education, Printing & Stationery, Labour, Employment, Skill Development & Entrepreneurship hova hman nise a ti a. Khuallian leh hnam puanzar zahna chibai buk turin 4th IR Battalion, Luangpawl, Mamit-te chu ruat an ni. Programme hi zing dar 10:00-a tan tura ruahman niin Ceremonial Function hman zawhah kalkhawmte tan At Home buatsaih tura rel a ni.

I-Day pual hian Mamit District chhunga VLTF zawng zawngte hnenah Covid-19 hrileng dona kawnga an hmalakna chawimawi nan Citation hlan theuh nise Meeting chuan a ti a. Citation hi DLAO, Mamit kaltlanga a remchan dan anga pek nise tih a ni.

Meeting-ah hian I-Day hmanna tura mawhphurhna chanvo hrang hrangte inruat nghal a ni bawk.

Vawiin thutkhawmah hian Mamit-a Sorkar Department hrang hrang Heads of Offices te, Khawtlang hruaitute leh tlawmngai pawl aiawh, MZP aiawh leh Thutharthehdarhtute an tel a ni.