No.3319/2021-2022

Aizawl 8th December, 2021 : Vawiin khan DC Conference Hall, Mamit-ah Dr. Lalrozama, IAS, District Bawrhsap hovin kan hma lawka Krismas 2021 leh Kumthar 2022 lo thleng tur chu boruak muanawm tak hnuaia mipuite'n hlim leh thlamuang taka an hman theihna tur atana dan leh thupek kenkawh dan tur chungchang sawiho a thutkhawm a ni.

Vawiin thutkhawmah hian kumin Krismas boruak vuakvetah kan tunlai hrileng mek laka kan him theih nana hmalak dan tur ngaihtuahho niin mawhphurhna leh chanvo hrang hrang inpek nghal a ni a. Puipunna hmunah te duty insiam a, theihtawpa mipui zirtirna pek thin ni se tih a ni. Zu leh ruihhlo laka kan fihlim theih nan a enkawltu department Excise and Narcotics te leh Police department-te theihtawpchhuah a tul thu tarlan niin khapna thupek zawmlo a, Halpuah, Halmawi leh Silai lem a mu nei chi hmang leh zuarte surprise checking neih thin ni se tih a ni a. Hei bakah hian MEN Dept. hmalaknain zu leh drugs laka kan fihlimna tur awareness campaign chu kan District chhung hmun hrang hrangah buatsaih thuai a nih tur thu ngaihthlak a ni bawk. Special Duty points Mamit chhim leh hmar tawp lamah siam ni se tih niin SP Mamit hmalaknain YMA te leh Excise te nen duty neih thin ni se tih a ni bawk.

Zan Curfew, halpuah leh halmawi hal leh Silai lem a mu nei chi bakah Sky Lantern te khapna thupek chhuah a nih anga District mipuite zawm vek tur leh Covid Appropriate Behavior, SOP te zawm theuh turin vawiin committee thutkhawm hian Mamit District mipuite a sawmin a ngen bawk a ni.

Meeting-ah hian SP, Mamit, CMO, DMS, Excise & Narcotics Department, DIPRO, Sub Hqrs YMA leh Jt VC aiawh bakah thutharthehdarhtute an tel a ni.