3113/2022-2023

Mamit 20th December, 2022 : Vawiin khan DC Conference Hall, Mamit-ah Pu Lalnunhlua, Mamit District Bawrhsap hovin kan hma lawka Krismas 2022 leh Kumthar 2023 lo thleng tur chu boruak muanawm tak hnuaia mipuite'n hlim leh thlamuang taka an hman theihna tur atana dan leh thupek kenkawh dan tur chungchang sawiho a thutkhawm a ni.

Vawiin thutkhawmah hian kumin Krismas boruak vuakveta mipuite kan him theih nana hmalak dan tur ngaihtuahho niin mawhphurhna leh chanvo hrang hrang inpek nghal a ni a. Zu leh ruihhlo laka kan fihlim theih nan a enkawltu department Excise and Narcotics-te chu theihtawpchhuah a checking leh duty a tam thei ang ber siama theihtawpchhuah a tul thu tarlan a ni a. October Ni 16-a khapna thupek chhuah tawh, Halpuah, Halmawi leh Silai lem a mu nei chi hman phal lohna Order bawhzuiin Mamit Police te'n dawr hrang hrang an lo check tawh thin chu uar lehzuala check zui zel nise tih a ni a. Hei bakah hian kum danga tih thin angin YMA Branch tin te'n anmahni huam chhung theuhah Duty point a tul angin siam a, mipuite himna atan Magistrate leh Police te nen tangkawpin duty neih thin ni se tih a ni bawk.

Meeting-ah hian tunlaia rukruk hluar mek chungchang sawiho niin rukrukna laka kan him theih nan Police te'n patrolling a tam thei ang ber neih thin nise tih a ni a, hei bakah hian venhimna kawnga hmalak dan tur hrang hrangte sawiho a ni bawk.

Halpuah, halmawi hal leh Silai lem a mu nei chi bakah Sky Lantern te khapna thupek chhuah a nih angin District mipuite zawm theuh turin vawiin committee thutkhawm hian Mamit District mipuite a sawmin a ngen a. Branch tin YMA Information aurinna hmangin he khapna thupek hi uar taka puan chhuah thin nise tih a ni bawk.

Meeting-ah hian SP, Mamit, CMO, DMS, DIPRO, Excise & Narcotics Department aiawh, khawtlang hruaitu leh tlawmngai pawl aiawh bakah thutharthehdarhtute an tel a ni.