No.2237/2021-2022

Aizawl 16th September, 2021 : Vawiin khan DC, Conference Hall, Mamit-ah Dr. Lalrozama, IAS District Bawrhsap kaihhruaina-in National Bank for Agriculture and Rural Development (NABARD) Mizoram Regional Office buatsaihin Rural Infrastructure Development Fund (RIDF) chungchang inhrilhhriatna hun District Level Sensitization Workshop on RIDF neih niin RIDF chungchang inzirtirna leh hemi kaltlanga Project awmte chhawr tangkai lehzual theih dan tur Line Department hotute nen zirhona neih a ni.

Meeting kaihruaitu Dr. Lalrozama chuan Mamit District chhunga NABARD kaltlanga hmasawnna hna kal mekte chu a nihna ang taka kalpui turin Line Department hrang hrangte chu a chah a, hmasawnpui ngei tura kan duh te'n hlawhtlinna an chang ngei em tih chu inzawt nawn fo tura a duh thu a sawi bawk.

He hunah hian Pu JD Traite, DDM, NABARD Kolasib leh Mamit bialtu chuan Rural Infrastructure Development Fund chungchang zirtirna neiin, RIDF chu Sawrkar laipui leh RBI te'n NABARD kaltlanga an kalpui a nih thu a sawi a, RIDF kaltlang hian hna peng hrang hrang 37-ah te Loan pekchhuah niin, Loan punna a tlem avang leh buaipui a awlsam avangin a remchan thu a sawi. Mamit District chhunga RIDF Project-in a huam tel Department hrang hrangte chu RIDF kaltlanga hamthatna awmte ngaihven tura chahin, hmasawnna ruhrel siam kawngah thahnemngai taka thawhhopuiah a sawm bawk. RIDF hnuaia Project hrang hrang kalpui tawh leh kalpui mekte a tarlan bakah Warehouse Infrastructure Fund (WIF) kaltlanga hmalaknate a tarlang bawk.

Vawiin meeting-ah hian NABARD kaltlanga Mamit District chhunga hmasawnna hnathawh hrang hrangte thlirho niin RIDF kaltlang hian Agriculture leh a kaihhnawih Sector Project-ah te Loan 95% pek a ni a, Social Sector Project leh Rural Connectivity Project-ah te Loan 90% a pek niin Loan punna hi kumtin za zela 2.75 a ni mek a ni.

Mamit District chhung bikah Project kallai mek 35 awmin RIDF Loan vaibelchhe 87.12 senna tur a ni a. Implementing Department - PWD, PHED, School Education, H&FW Department, Soil & Water Conservation, AH&Vety leh Agriculture Department hnuaiah thawh mek a ni, heng bakah hian Warehouse Infrastructure Fund (WIF) hnuaiah cheng vaibelchhe 6.82 hu WIF Loan senna tur Project panga, Line Department hrang hrang - FCS&CA, Horticulture leh Agriculture Department te'n thawh mek a ni bawk. NABARD chuan Mizoram State pumpuia RIDF Project ( I to XXVI) kaltlangin Project pawmpui 641 thawh nan Loan cheng vaibelchhe 1596.35 a sanction tawh a ni.

Vawiin District Level Sensitization Workshop on Rural Infrastructure Development Fund ( RIDF) ah hian RIDF hnuaia Project hrang hrang kalpuitu leh a kaihhnawih Department hotute an tel a ni.