739/2025-2026
Dated: Mamit the 5th of June,2025: Vawiin khan DC Conference Hall,Mamit-ah Nari Adalat hawnna hun chu Pu K Laltlawmlova, District Bawrhsap chu Khual lian niin hun a hmanpui. Nari Adalat hi Village Council level-a hmeichhiate thubuai remna tura duan niin, India ramah district thlanchhuah bikah chauh hman tura duan a la ni.
Pu K Laltlawmlova chuan Nari Adalat, hmeichhia te tan court Mizoram a Mamit district a hawn hmasak bér a ni chu lawmawm tiin hmeichhiate dinhmun chawikan nan ni chhinchhiah tlak a ni a ti a. District Bawhrsap chuan tunlai khawvelah sikul result en in hmeichhia te titha pawl an ni hlawm a, hmasawnna nasa tak kan hmuh rualin hnufualna a la tam a, hemi kawngah hian hmeichhe chawikan nan aw chhuah theuh a tul a ni a ti a. Sawrkarin hmeichhiate dawmkan leh hamthat nan schemes tám tak a neih te chu hman tangkai a tul a, kan theihna zawn theuh a kawh hmuhtu ni tum teuh turin hawnna hun a lo kal te chu a chah.
Vawiin hunah hian Pi Zoramthangi Chhangte, Director, WCD chuan Nari Adalat sawi zauna hun hmangin Nari Adalat chu Mizoramah a vawikhatna tur atan Aspirational District anih angin Mamit District chu thlan a nih thu a sawi a, hmeichhia ten an harsatna tawh hrang hrang rorelna sang zawk pan kher lova VC level-a chinfel theihna a awm thar tur chu hmeichhiate tan thil lawmawm tak a ni ti.Pi Flora Laltanpuii, Dy Director & DPO, WCD Mamit chuan hawnna hun hi a kaihruai a, Pi Carolyn LB Khiangte,Addl DC Mamit chuan lawmthu sawina hun hmangin vawiin hun hi a khar. Vawin hunah hian Nari Adalat Member thar te bakah Mamit District chhunga Block hrang hrang BDO te leh sawrkar officials te an tel a ni.
Nari Adalat hi Women & Child Development, Mission Shakti Scheme (Sambal) hnuaia kalpui tura duan niin kum 2023 khan Ministry of Women & Child Development hnuaiah din tan a ni a, Mamit district chhung khaw 10-ah din a ni dawn a, chung khuate chu heng khaw sawm (10), New West Phaileng, Lallen, Damparengpui-I, Zawlnuam Vengpui, Kanhmun, Kawrthah South, Reiek, Rawpuichhip, Kanghmun, RajivNagar-I-ah te din a ni. Member te hi Block Development Officer (BDO) te kaihhruaina hnuaiah VC Member te nena ruat an ni a, VC Member, Khawtlang tana mi rintlak leh mi pawimawh, Hmeichhe Zirtirtu, MHIP, SHG Member, Anganwadi Worker, YMA emaw Ngo atangte in member pakhat theuh ruat chhuah an ni.
