Nizan khan I&PR Conference Hall Mamit-ah Nehru Yuva Kendra Mamit leh Sub Hqrs YMA Mamit tangkawpin an buatsaih Neighbourhood Youth Parliament Programme neih a ni a. Dr. Lalrozama, IAS, District Bawrhsap chuan khuallian niin a hmanpui.

Khuallian chuan ram hruai tur emaw hmasawn tur chuan thalaite kan pen chhuah a ngai a. Sorkar tiche tur pawhin thalaite kan chet a ngai a, thalaite kan chet chhuah phawt chuan Mamit hian hma a sawn thei a. Mamit hmasawnna tura theihtawpa thalaite che chhuak turin a sawm a. Tum neia kan kal chuan hlawhtlinna a awm thin a. Mahni leh midangte tana kan penchhuah a ngai a ni a ti. Aspirational District kan nihna tihbo chu Sorkar Department-te tihtur chauh ni lovin mitinin mawh kan phur a ni a ti bawk.

Pi C. Lalnuntluangi, District Youth Coordinator, Youth Parliament hman a nih chhan leh a tumte tarlangin NYK kaltlanga thalaite hmakhua ngaia hma a lak dante a sawi bawk. Mamit District thalaite chuan  Sorkar chu engtin nge kan nawr kal theih ang tih ngaihtuahna seng turin a sawm  a ni.  Kan hmalawkah hian District Level leh State Level-ah Waste Management chungchangah intihsiakna lawmman tha tak siama buatsaih a nih dawn thu a sawi a. Hrechiang duh tan NYK Office-ah zawhfiah reng theih anih thu a sawi.  

Youth Parliament ah hian Mamit khawpui chhung YMA  Branch pali Venghlun, Chhimveng, Hmarveng leh Bazar Veng atangin Extempore Speech Ruihtheih thilin khawtlang leh mimal a tihbuai dan, Nungcha leh ramngaw humhalh pawimawhna leh Zirna in a tum chu mi hmantlak chherchhuah tih thupuia hmang te'n intihsiakna neih a ni a.  Lawmman pakhatna hi Venghlun Branch in la-in Pahnihna hi Chhimveng Branch te'n an la a. Pathumna hi Hmarveng Branch te an ni.

He hun hi Pu K. Eley Rosanga, President, Sub Hqrs YMA-in kaihruaiin Mamit khawpui chhung thalaite an tel a ni.