Nimin khan I&PR Conference Hall Mamit-ah UD&PA Deptt leh PHED Mamit buatsaihin Plastic Free Zone Cum National Award ( Swachh Mohatsav 2019) lawmna neih a ni a. Dr. Lalrozama, IAS, Mamit District Bawrhsap chuan khuallian niin he hun hi a hmanpui.

Khuallian chuan mi thahnemngai leh inpe tak takte zarah Mamit khawtlang kan mawi a. Kan hmalam hunah thil tihtur hmabak leh hna hautak tak tak hmachhawn tur nei mahila kan khawtlang inlungrualna avangin tha taka kan hlen theih ka beisei a ni a ti. Pi Laltharzeli, National Awardee kan nei chu thil ropui tak a ni a. Mi hlawhtling tak tak chu midang an chherchhuah tam leh tam lovah teh thin anih angin mi thahnemngai tam tak a chherchhuah a beisei thu a sawi bawk. Mamit District hmasawnna tura theihtawpchhuah zel turin kalkhawmte a sawm bawk a ni.

He hunah hian Pu C. Sawihlira, DUDO, UD&PA Mamit-in Plastic hman that lohzia chipchiar taka sawiin Pu Lalzawmliana, Sr. EE, PHED Mamit WATSAN Division pawhin Power Point Presentation hmangin PHED Mamit-in faina kawnga hma a lakna hrang hrang Report a pe bawk.

He hunah hian District faina leh thianghlimna tura theihtawpchhuahtute Dr. Lalrozama, District Bawrhsap, Pu Lalzawmliana, Sr. EE, PHED Mamit WATSAN Division bakah Pu H.D Lalpekmawia, SDO (Sadar) Mamit hnenah chawimawina thuziak an hlan a ni.

He hun hi Nl. C. Lalrinhlui'n Host-in Pi Laltharzeli, National Awardee chuan thutiam sawi rualtirna bakah Award dawng thei tura hmalakpuitu Department leh khawtlang mipuite chungah lawmthu a sawi a. He hunah hian Mamit khawpui chhunga tlawmngai pawl hrang hrang aiawh, khawtlang hruaitute bakah Department sawmbikte an tel a ni.