1111/2022-2023
Mamit 30th June, 2022 : Vawiin khan Chhimveng YMA Hall, Mamit-ah Mizoram leh India Sawrkarin inremna thuthlung an ziah champha Remna Ni lawmna hun hman niin Pu R. Lalzirliana, Hon'ble Minister P&E, Art & Culture chuan khuallian niin a hmanpui.

Khuallian chuan Remna lawm tur leh a nawmzia hre tur chuan rambuai hreawm zia leh remlohna hmun nawm loh zia kan hriat a tul a. Mizoramin Remna a neihna kawngah sawi dan leh pawm dan in anglo pawh lo awm mahse Remna kan neihah hian ka tel ve a ni tih kan in pawm tlan a pawimawh a ni a ti. Remlohna hmunah rorelna dik a awm theilova, hlauhawm tam tak a awm thin avangin zalenna kan neihte hluta chhawm nung zeltu ni turin kalkhawmte a sawm a ni.

Minister chuan thangthar zawkte pawhin remna hlutzia hre tur chuan rambuai hreawm zia kan hriat a tul a, mizo fate chu insawichhiatna leh diriam taka in tawngkhum ai chuan inchawimawi tawna midangte thatna lai hmuh saktu kan nih chuan kan ram hi a nuam zel ang a ti bawk.

Pu Lalrintluanga Sailo, Govt. Deputy Chief Whip, MLA 2-Dampa pawhin he hun hi hmanpuiin Mizoramin remna a neih theihna tura sulsutute hlutzia tarlangin remna in a ken tel ram hmasawnna hlutzia hre thara vawnghimtu ni zel turin kalkhawmte a sawm bawk.

Pu Lalnunhlua, District Bawrhsap pawhin inlawmna thusawiin kum 20 chhung rambuai avanga hun hreawm taka kan awm hnuin remna hlu tak avanga kan ramin hmasawnna a hmuhte hrerenga, ram leh khawtlang tana hmalam kan pan zel a tul thu a sawi.

Remna ni lawmna hunah District chhung Zirna In atanga kumin 2022-a HSLC/HSSLC/ College Level-a 100% zirlai pass nei, Gov't Zawlnuam College leh Presbyterian English School, Mamit te hnenah chawimawina hlan an ni a. Heng bakah hian Mamit District chhunga zirlai tithate 1. MK. Bertila, Bazar veng Mamit (Mizoram University hnuaia result tihchhuah takah Mamit College atangin English Subject bikah Mizoram pumah pariatna a ni) 2. Lalrosangi, High School veng, Mamit (Mizoram University hnuaia result tihchhuah takah Pachhunga University College atangin Mathematics Subject bikah Mizoram pumah pakhatna a ni) 3.Zothanpuii, Mamit Lungsir (HSSLC Result tihchhuah takah Mizo Subject bikah Mizoram pumah pakhatna a ni)

He hunah hian Chairman KHJC, Sub Hqrs MHIP, Sub Hqrs. YMA leh MUP President theuhte hnen atangin thusawi tawi ngaihthlak a ni a. Remna Ni puala buatsaih Documentary Clip thlirho niin Pu Lalfakzuala, Addl DC chuan lawmthu sawina a nei bawk.