2487/2024-2025

Dated: Mamit the 11th of October, 2024: Vawiin chhun khan DC Conference Hall, Mamit-ah Right to Information week 2024 puala hun hman a ni a, Addl DC Pi Carolyn LB Khiangte chuan thusawina  hun a hmang. 

He hunah hian Pi Carolyn chuan thu sawiin RTI week 2024 hmang tur a lo kalte hnenah lawmthu a sawi a. RTI chu India khua leh tui chawikan nante (empowerment of citizens), langtlang sawrkar (transparency) neih nan te, sawrkar thuneituten mawhphurna (accountability) an ken that nan leh eiruk dona atan hmanraw pawimawh tak a nih thu a sawi a. Addl DC chuan SAPIO, SPIO leh department aiawh lo kalte hnenah chuan mipui rawngbawl nan RTI chu tangkai taka hmang turin a chah a, hmasawnna atan hmanraw pawimawh  a nihna angin RTI chu dik tak a hmang turin vawiin a kalkhawmte chu a sawm bawk a ni.

Vawiin program hi Pi Biaknungi,DIPRO chuan a kaihruai a, Pi Sapliannguri ,District Resource Person leh Superintendent DC Office ni bawk chuan RTI Act 2005 sawi zauna hun a neih hnuin zawhna leh chhanna hun hman a ni a, Pu Lalnunfela SDO (Sadar) chuan lawmthu sawiin hun a khar a ni. 

Right to Information Act hi kum 2005 khan hman tan a ni a, Mizoram-ah pawh Mizoram Information Commission (MIC) chu kum 2006-ah din niin  RTI Act hi hman tan a ni a. RTI week hi kum tin India ram hmun hrang hrangah October 5th atanga 12th inkarah hman thin a ni.