2537/2024-2025

Dated: Mamit the 16th of October, 2024: Vawiin chawhma dar 10 khan Chhim Veng YMA Hall, Mamit-ah “Career Awareness Campaign for High School Students of Mamit” neih a ni a, District Bawrhsap Pu Jacob Lalawmpuia chu Khual lian niin hun a hmanpui. He campaign hi SCERT bul tum niin Mizoram hmun hrang hrangah ruahman a ni.

He hunah hian Khual lian chuan Mamit chu Sawrkar laipuiin Aspirational district (district hnufual chawikan ngai) 115 a thlan chhuah te zing a pakhat a ni a, hemi sector atan a pawimawh em em chu education niin vawiin ang program SCERT bul tum a neih a nih chu lawmawm a tih thu a sawi a. Bawrhsap chuan zirna lam a MOC(Mamit Officers Club), district administration te hmalakna teltu ber chu zirlai te an nih thu a sawi a, tangkai pui leh hlawk thlak tak a hun hmang turin a ngen a.

Pu Jacob Lalawmpuia chuan zirlai te chu thil pahnih pawimawh an nun a vawng reng tur a tih chu pakhatnaah chuan lifeskills -nu leh pa thuawih leh aia upa te zah a ni a ti a, hemi tel lo chuan nun tha a neih theih loh a ni a ti a. Pahnihnaah chuan hrehawm tuar peih tur a inbuatsaih hi a tul thu sawiin, hlawhtling tur chuan teirei peih a, hrehawm tuar huama lehkha zir a tul a, nuam tak a hlawhtlin tum lo a, thahnem ngai leh dawhthei tak a hlawhtlin tum turin vawiin a zirlai kalkhawm te chu a chah a ni.

He hun hi Pu Emmanuela,Addl DPC chuan a kaihruai a, Pu K Malsawmhlua Vice Principal,DIET chuan opening remarks sawiin Pu F Lalliansanga, Deputy Director(SPW) SCERT chuan lawmthu sawina hun a hmang. Chawhnu lamah Session II neih a ni a, hetah hian zirlai te tan a hriattur pawimawh hrang hrang- Carrer planning te, Vocational Education/Skill Development, Career in Arts, Science & Commerce , Entrepreneurship leh NTA chungchang te sawina hun neih a ni a, SCERT a lecturer ten he hun hi an kaihruai a ni.

Vawiin program-ah hian school paruk(6) atangin zirlai 379 leh zirtirtu te a tel a, MZP hruaitute pawh a tel a ni.