No.4392/2021-2022
Aizawl 24th March, 2022 : Vawiin khan ramchhung hmundangte rualin World TB Day, 2022 chu Mamit I&PR Conference Hall-ah hman a ni a. Pu Lalnunhlua, District Bawrhsap chuan khuallian niin a hmanpui.

Khuallian chuan TB natna chu a hun taka hmuhchhuaha enkawl chuan tihdam theih a nih thu a tak ngeia tawngtu a nih thu a sawi a. Khawvel pumah TB natna chu kum 2030-ah umbo tum a ni a, India ramah erawh kum 2025-ah umbo tura hmalakna kalpui mek a nih thu a sawi. Kan District-a TB lama thawktute hmalakna a fakawm hle a, hmasawnna duhawm zawk nei zel tura theihtawpchhuah zel turin a sawm.

District Bawrhsap chuan kan thupui ang ngeia kan hun leh tha, sum leh pai, ngaihtuahna senga TB natna umbo a nih theih nana mahni theihna zawn theuha thawkchhuak turin kalkhawmte a sawm a ni.

World TB Day pual hian (TB Mukt Bharat Campaign @ AB - HWC) khuhhawnna khuallian hian a nei nghal bawk.

Kumin World TB Day thupuiah hian "Invest to end TB Save Lives" (TB umbo turin i tha leh zung seng la, Nunna chhanhim rawh) tih chu hman a ni.

Dr. Lalnuntluangi Khiangte, DTO chuan report pe-in TB damlote zawng chhuaka enkawl dam turin National TB Elimination Programme staff-te'n theihtawp an chhuah thin thu sawiin, kum 2020-ah khak exam 615 -ah TB natna hrik 51 hmuhchhuah a ni a. Kum 2021-ah 795 exam-ah 42 hmuhchhuah niin kum 2022 kumkal mekah mi 81 exam tawhah mi 12 hmuhchhuah tawh an ni bawk. TB natna hrik hmuhchhuahte hi thla 6 chhung damdawi pek an ni a. Damlo tan hian Nutritional Support thlatin Rs. 500/- leh damlote'n treatment an lak zawhin an veivahna senso Rs. 750/- pek thin an nih bawk thu a sawi. TB natna neia inringhlel te tan arang thei ang bera Hospital-a in-checkup vat turin District chhung mipuite a sawm bawk a ni.

He hun hi Dr. Zothankhuma Chhakchhuak, CMO Mamit chuan kaihruaiin Pu Lallawmzuala Tochhawng, District Supervisor, Piramal Foundation- in thu a sawi bakah Lalmuanpuii TB vei dam lehin thu a sawi bawk. Rev. C.Sapchhawnngura'n hunserh hmangin, Dr. Vanlalzuatliana'n lawmthu a sawi bawk a ni.