MZP buatsaihin vawiin Zirtirtute Ni Mamit-ah hman a ni a, hemi pual hian zirlai ten zirtirtute chawimawina kawngzawh an nei a ni.

Zirtirtute Ni pual kawngzawh hi zing dar 6:30 ah tanin, Charkawn atangin High School veng thleng zawh a ni a. Zirlai ten zirtirtu te chawimawina thuziak hrang hrang anmahni siam ngei kengin kawng hi an zawh a ni. Kawng zawh tawpah Govt. Mamit High School kawtah inkhawm tawite neih a ni a, hetah hian MZP Hqtr Mamit President Lalropuia kaihhruaiin zirtirtute zahna leh chawimawina thu chham rual a ni. Pu Micky Lalenkawla, DPC SSA chuan Zirtirtu te Ni puala Prime Minister Narendra Modi thuchah a chhiarchhuak a ni.

Pu C.Lalnunmawia, SP Mamit chuan zirtirtute zahna chibai bukin, ram leh hnam tana mi tha chherchhuaktu an nih thu a sawi a, an hnathawh hlu tak te avangin chawimawi an phu a ni a ti a.Zirlaite leh khawtlang mipuiten zirtirtute pawimawhna leh inpekna te hria a kan zah leh chawimawi an phu a ni a ti.

Hemi ni pual hian Mamit district a khaw hrang hrang local cable TV a chhuah turin Mamit DC chuan thuchah a sawi bawk a. School hrang hrang-ah nimin khan zirtirtute ni pual hian hun hman a lo ni tawh bawk.