2706/2022-2023
Mamit 17th November, 2022 : Vawiin khan Gov't. Mamit College-ah "Zoram Harh Rawh Campaign" programme hman niin Mamit District chhunga YMA Branch hrang hrangte tana Mizo hnam lam leh Folk song hmanga inelna chu zawhfel niin Pu Lalnunhlua, District Bawrhsap chuan khuallian niin a hmanpui.

District Bawrhsap chuan ruihhlo leh a kaihnawih reng reng chu tihchhin loh hi a inven dan tha ber a nih avangin chhungkua anga inzirtirna-ah pawh kan neih a tul thu a sawi a. Zoram Harh Rawh Campaign" hial hman a lo ngai ta chuan kan thalaite, ruihtheihthil leh a kaihhnawih laka kan fihlim a tulzia a tarlang a ni a ti.

He hunah hian Pu Robert Lalrempuia, State Programme Officer, MSACS chuan HIV/AIDS leh ruihhlo kaihhnawihin Mizo thalaite min run dan tarlangin Mamit District chhunga thalaite pawh nasa taka tan kan lak a tul a, Mizo zingah kumtin danin mipa piang tam zawk anga chhut thin nimahse tun dinhmunah hmeichhia voters an tam zawk chuan mizo mipate kan thanharh a hun takzet zia a tarlang chiang hle a ni a ti.

"Zoram Harh Rawh Campaign" Programme hnuaiah hian nimin khan DC Conference Hall-ah District Level Organising Committee te tan HIV/AIDS Advocacy talk show hmangin District Bawrhsap hova hman a ni bawk.

Vawiin "Zoram Harh Rawh Campaign" programme hnuaia YMA Branch inelna-ah hian Lawmman pakhatna hi Reiek Branch YMA-in dawngin Pahnihna hi W. Phaileng Branch an ni a, Pathumna hi Hmarveng leh Venghlun Branch YMA, Mamit-te an ni.

"Zoram Harh Rawh Campaign" Programme-ah hian Pu Lalfakzuala, Addl. DC chuan lawmthusawina a nei a, Sawrkar Officials te bakah YMA Branch hrang hrangte an tel a ni.