No.3404/2021-2022
Aizawl 15th December, 2021 : Vawiin khan Mamit Bazar veng Children Sanitation Club din cham kum 5-na leh veng fai ber lawmna hun hman niin Dr. Lalrozama, IAS, District Bawrhsap chuan khuallian niin a hmanpui a, Pu Paul Rokima, DIPRO, Mamit pawhin khualzahawm niin a hmanpui bawk.

Vawiin hun hmanpuitu Dr. Lalrozama chuan faina leh thianghlimna hi changkanna bulpui ber a ni a, faina kawnga hmala turin sawi mai chu a harlo, a taka thawkchhuaktu nih hi a har lai ber a ni tiin, Mamit Bazar veng te'n faina kawnga hma an lakna rah hmuhchhoh a ni zel chu lawmawm a tih thu a sawi. Naupangin faina kawnga hmalakna an neih zel theihna turin an rilru-a faina tuh chu beidawng lova hmalakpui zel turin a chah bawk.

Pu Paul Rokima, DIPRO Mamit chuan faina kawnga mi inpe te tan Youtube Channel Samaritan Lushai Channel chu tlangzarhna neiin he Channel hi mi zawng zawngte faina kawnga inzirtirna hmanraw tangkai leh hlut hlawh tak a nih chhoh zel a beisei thu a sawi a. Kan bul tanna te rih mahse taihmakna nena hmalam kan panpui a nih chuan channel thangduang leh lar zawka a inhlankai ngei a beisei thu a sawi bawk.

He hunah hian Mamit Bazar veng MHIP-in an vengchhunga in leh a vel fai ber lawmman pakhatna C. Lalrinsanga. Pahnihna. JH. Vanlalliana. Pathumna Lalthanmawii & Lalramnghaka te hnenah Chawimawina thuziak leh pawisa fai hlanna neih nghal a ni.

He hunah hian Jt. VC aiawh, Sub Hqrs YMA, Sub Hqrs MHIP, Bazar veng VCP bakah mi sawmbikte atangin faina kawnga hmalakna tur bakah Bazar veng khawtlangin faina kawnga an hmalakna fakawm an tih thu an sawi a ni.

Bazar veng Children Sanitation Club hi December 15, 2017 khan din niin a din tirh atangin tha thlah miah lovin Mamit Bazar veng hian faina kawngah hmalain, Bazar leh a chhehvelte thianfaiin hnatlang an nei thin a. He pawl dintu Pi Laltharzeli, Mamit Bazar veng chuan faina kawnga a thawhhlawk avangin chawimawina ropui tak National Award a lo dawn phah hial tawh a ni.

Children Sanitation Club Mamit Bazar vengte hian an dincham pualin Vohbik Nl. Hrilvelthangi hnenah thilpek an hlan bawk a ni.

He hun hi Pi Laltharzeli, Secretary, MHIP Mamit Bazar veng chuan kaihruaiin mi sawmbikte leh Children Sanitation Club Members te an tel a ni.