No.177/2020-2021 

Vawiin khan DC Conference Hall, Mamit-ah Er. H. Lalzirliana, Mamit Bialtu MLA hovin Mamit khawpui chhunga Sorkar Department hrang hrang Heads of Office-te chuan tunlai hrileng mek Novel Coronavirus avanga Mamit District chhunga hmalakna hrang hrangte thlir hovin an thukhawm.

Mamit Bialtu MLA chuan DC kaihhruaina hnuaia District Level Task Force hmalakna-ah lawmthu a sawi a. Kan District Chhunga Heads of Office (HoO)-te action plan leh an hmalak tawhna chu tha a tih thu leh lawmawm a tih thu a sawi bawk. Mamit District chhunga VLTF hnathawh chu ropui a tih thu sawiin sorkar atanga hlawh la lo an ni chungin hrileng laka kan himna atana an hnathawh leh hmalaknate chu fakawm a tih thu a sawi bawk. Kan District chu International leh Inter State boundary nei kan nih avangin he hri laka kan him theih nan theihtawp kan chhuah chhunzawm zel a ngai a. Tun thlenga chhuanchham, meialh ringawt en a awm kan la awm lo-te hi a vanneithlak a. Kan bial theuhah theihtawp kan chhuah a tul a, tun hun hi tan rualna hun a ni tih hria a, kan ram leh hnam tan tlawmngai taka he hri hi do turin a chah a ni.

Meeting-ah hian tunlai hrileng mek avanga mipuite'n nitin mamawh hrang hrangah harsatna an tawh lohna tura ruahmanna te thlirho a ni a. Tun dinhmunah Buhfai-ah harsatna a awm lova, Mamit leh W. Phaileng khawchhung tih loh chu Buhfai Stock sa hi August thla leh December thla thleng a awm thu Meeting-ah hian tarlan niin Oil leh Gas-ah mipuite'n harsatna kan tawh lohna turin Gas Distributors te'n Indenting chak se tih a ni a. Mipuite'n hnianghnar taka Gas kan neih theihna tura indent zung zung turin Gas Distributors-te ngen an ni a. Gas Distributors-te lo vilzui turin DCSO Mamit chu Meeting hian a ngen nghal bawk.

Meeting-ah hian lockdown chhunga mipuite'n awlsam zawka thlai thar kan lei theih nan Darlak, Phaizau leh Dapchhuah khuate atangin Horticulture Department Mamit leh VLTF tangkawpin Mamit khawpui chhungah thlai thar an chawkluh thin thu tarlan a ni a. Mitin mamawh tui chungchang sawiho niin power supply a awm that chuan pump reng a nih thu leh power khaihlak awm palhah pawh Diesel Stock a nih thu report ngaihthlak a ni.

Meeting-ah hian Mamit District-in Electric eng chungchanga harsatna kan tawh loh nan P&E Department-in theihtawp a chhuah thu ngaihthlak a ni a. Line chhiat palhah pawh siamtha tura che chhuak vat turin an inpeih reng thu ngaihthlak a ni bawk. Excise Department Mamit pawhin theihtawpa hma an lak mek thu Meeting-ah hian tarlan niin amaherawhchu Judicial lam atangin an mi mante Charge loh tur tih a nih avangin Parole-in an mi mante chhuah lailawk an nih thu tarlan a ni.

Vawiin MLA hova thutkhawmah hian Health Department, Mamit chuan COVID-19 vei awm palh thulha an enkawlna hmun tur Isolation Ward, District Panchayat Resource Centre (DPRC)-ah buatsaih a nih thu an tarlang a. A tul huna chechhuak thei turin  Doctor leh Nurse COVID-19 natna kai chauh enkawl tur detailment siam a nih tawh thu tarlan niin Personal Protective Equipmemt (PPE) leh Mask, Doctor leh Nurse-te hman tur an neih kim thu report ngaihthlak a ni bawk.

AH&Vety Department pawhin kan District chhungah Daily Animal Health status khawnkhawm thin anih thu leh report siam thin a ni thu Meeting-ah hian an tarlang a. Broiler leh a chaw bikah theihtawpchhuahin arvulhtute nen hma an lak mek thu an tarlang bawk.

Khawvel puma natna hrileng mek Coronavirus-in kan District chhung a rawn luh lohna turin Police leh 4th IR Bn -te hmalaknain Border bakah Mamit District luhna leh chhuahna-te uluk taka venhim a ni a. Border leh khawpui chhungah Petrolling neih thin anih thu vawiin Meeting-ah hian ngaihthlak a ni bawk.

Vawiin Mamit Bialtu MLA hova thutkhawmah hian Mamit khawpui chhunga Heads of Office-te an tel tha hle a ni.