Vawiin khan DC Conference Hall, Mamit-ah Dr Lalrozama, IAS District Bawrhsap hovin tlawmngai hrang hrang, khawtlang hruaitute te leh Political Party hrang hrang aiawh te'n  Mamit District hmasawnna tura thawhhona tha zawk a awm theihnan inkawm hona neih a ni. 

Meeting kaihruaitu Mamit  District Bawrhsap thar chuan    Mamit District hmasawnna turin Sawrkar Department tan maia thawh theih a ni lova, khawtlang hruaitu, tlawmngai pawl hrang, Political Party te nena in lungrual taka kan thawhtlan a pawimawh dawn thu a sawi a. Mamit District chu Aspirational District kan nih angin chawikan kan nihna tura hmalakna hrang hrangah a hlawhtlinna hmu turin khawtlang hruaitu leh tlawmngai pawl aiawhte an pawimawh hle a ni a ti.

Vawiin meeting-a kalte hian  Mamit District hmasawnna tura rawtna hrang hrang an neihte District Bawrhsap hnenah hian thlenin mipuite harsatna thlen zawnga  kawngpui dung-a motor park chungchang, Khawpui chhunga hmun lunlaia Motor siamna Workshop awmte, Vantlang kawng tibawlhlawh zawnga ran talh leh Ui leh Ar chhuah zalen chungchanga khapna thupek felfai leh khauh zawka siam ni se an duhthu an thlente chu District Bawrhsap chuan SDO (Sadar) hmalakna hnuaiah a theih ang anga tihhlawhtlin tum a nih thu a sawi.

District Bawrhsap chuan kan hma lawka MP Election kan neih turah boruak muanawm tak leh mipui a tam thei ang berin vote an thlak a hlawhtling taka kalpui a nih theihnan khawtlang hruaitute chu a theih ang anga an mahni veng chhung theuhva hmalak pui turin a sawm bawk a ni.

Meeting-ah hian SP Mamit, Addl DC, Mamit Public Relations Officer, Mamit, DC Office-a Officers te bakah Tlawmngai pawl hrang hrang Sub Hqrs YMA, MHIP, MUP leh MZP aiawh, Khawtlang hruaitute leh Political Party hrang hrang aiawhte an tel a ni.

Attachment

  • Loading attachment...