No.4138/2020-2021

Mamit 16th August, 2020 : Vawiin khan Dr. Lalrozama, IAS, Mamit District Bawrhsap chuan Tuidam leh Kawrtethawveng khaw inkar, kawng laih thar kawng chhak leimin kara mihring ruhro an hmuhchhuahna hmun a tlawh.

Ni 14/08/2020 (Zirtawpni) zing dar 10 bawr vela an hmuhchhuah mihring ruhro-ah hian luruh 12 vel zet hmuhchhuah a ni a. Heng ruhrote hi Kawrthah Police Station-a lak anih hnuah vawiin khan Superintendent of Police (SP) Mamit Custody-ah lak chhoh a ni.

Dr. Lalrozama chuan tuna ruhro hmuhchhuahte chu him taka dah that a pawimawh thu sawiin chutihrualin ruhro dangte pawh la awm thei a ni a, a la awm leh awm loh hriatchian a, a dang a la awm anih chuan a theih ang anga zawnchhuaha dah that a tul dawn thu leh chumi hnuah mithiam zawkte hnenah emaw pek dan tur ngaihtuahho a pawimawh dawn thu a sawi a. Ruhro hmuhchhuahte chu INTACH Mizoram tan pawh thil pawimawh tak a nih dawn thu a sawi a ni.

Mamit SP charge la mektu Pu Zoramthara, Addl.SP Mamit pawhin ruhro hmuhchhuahte chu Crime lam nen inkungkaihna a nei em tih ngaihtuah nghal a ni a, DNA Profiling tur atan dah that a pawimawh a ni tiin Forensic Science Laboratory (FSL)-ah a tul dan anga zirchian turin thawn anih dawn thu a sawi.

Kawrtethawveng leh Tuidam inkara luruh chharna hmun hi Pu Lalchungnunga huan ram a ni a, luruh dang ala awm em tih enchiang turin Tuidam YMA-te hian uluk lehzualin hma lo la se tih niin, Lei a min belh zel loh nan YMA hmalakna hian Silpauline-in khuh nise tih a ni. He lai hmun hi District thuneitute phalna lo chuan tumah tlawh pawh lo turin mipuite ngen kan ni a. Huan neitu Pu Lalchungnunga pawh helai hmunah hian kutthlak hrih lo tura ngen nghal a ni bawk.

Mamit District Bawrhsap hi Pu Vanlalthanga, Tuidam YMA President-in lo dawngsawngin Pu Zoramthara MPS, Addl. SP, Pu Victor Lalawmpuia, SDO (Sadar), Pu Paul Rokima, DIPRO, SDO PWD Tuidam, SDPO Kawrthah bakah thutharthehdarhtute'n an tawiawm a ni.