No.493/2020-2021

Mamit 21st April, 2020 : Vawiin khan Dr. Lalrozama, IAS, Mamit District Bawrhsap/ Chairman, DLTF Mamit leh District Officials thenkhatte chuan Zomuantlang khua an tlawh.

Mamit District Bawrhsap chuan COVID-19-in kan ram a rawn luh lohna tura Zomuantlang khua-a duty, 5th IR Constable pahnih, Zairemmawia leh C. Lalhruaitluanga te'n Ni 18 April, 2020 (Inrinni) tlaia Chakma-te kut an tuar chu pawi a tih thu a sawi a. Khawvel pum hrileng buaia a buai laiin hnam leh hnam, chi leh chi inkara buaina chawhchhuah hun a nih loh thu leh India ram chhunga cheng, eng hnamte pawhin he natna hi thahnemngai leh inthurual taka kan do tlan a pawimawh zawk a ni a ti.

District Bawrhsap chuan COVID-19 rawn lut tur venga hah taka ramri-a duty, force mite leh tlawmngaia thawk chhuakte chungah lawmthu sawiin an thawhrimna leh inpekna te avangin Mizoram pum thlamuang takin kan awm phah a ni a ti bawk.

Vawiin vek hian Zomuantlang khaw dep Kawnpui - I (Tripura)-a Anil Chakma te chenna In kang chu Mamit DC leh District Officials-te hian an tlawh nghal a. A hmunah hian Tripura lam atangin North Tripura SP aiawh Pu Francis Darlong, TPS chuan a lo dawngsawng a ni. Tunlai boruakah hnam thilah thil duhawm lo thleng thei anih avangin In kan chhante hi zawhchian an ni a. Zomuantlang VLTF Chairman bakah Tripura Police Official-te sawidanin Pu Anil Chakma te chu an In kan lai hian inah awm lova, ram lama an riahlai anih thu an sawi a. In kan chhan hi chiang taka hriat a la ni lova, Inquiry lak mek anih thu Tripura Police-te hian an sawi bawk. Pawikhawihtu hi FIR register a, a ranglama man vat turin Tripura Police Official-te hi an ngen nghal a ni.

Tunlai boruak thleng mekah hnam thil ang zawnga hmehbel a, Social Media-a thu ziktluak lo post ching an awm thin chu pawi an tih thu an sawi a. Hemi chungchangah hian Mamit SP chuan Tripura police thuneitute chu Social Media Account-a thu dik ziktluak lo post-tu hi man a, action la turin a ngen nghal bawk a ni. Tunah hian Zomuantlangah hian boruak duhawm lo thleng a awm lova, State pahnih ramri-ah te hian Tripura leh Mizoram atangin Police an duty mek a ni.

Mamit District Bawrhsap hian Zomuantlang VLTF-te Meeting neihpui nghalin harsatna an neihte sawiho zui nghal a ni a. An khaw tan hian Buhfai Bag leh Dal Bag a hlan nghal bawk a ni.

Attachment

  • Loading attachment...