No.6421/2020-2021
Mamit 1st November, 2020 : Dt 31st October, 2020 Mamit DC leh Karimganj DC- te inbiakna atanga thuchhuak chu mipuite'n kan hrefiah tawk lo niin a lang a, a hnuaia mi ang hi nimin meeting-a inbiakna tlangpui chu a ni.
Karimganj DC-in a mimal ngaihdan a sawi lan, Mizoram Armed Police-te Assam rama awm mek anga a sawi chu ama mimal ngaihdan mai a ni a; chu chu Mamit DC hian a pawmpui tih khawiah mah ziakin a lang lo a ni. Mamit DC chuan tuna Mizoram Armed Police awmte hi mipuite venghim tura kan ram chhungah awm an ni a, chuvangin sipaite laklet emaw, hnuhdawh emaw hi kan tum lova; helai hmunah hian remna leh muanna a awm theih nan te, kan mipuite hum tur leh kan ram venghim turin kan ram chhungah kan sipai te kan dah zawk a ni a ti a. Hei hi Assam sawrkar pawhin an hrethiamin an lawm hle zawk tur a ni a ti.
Nimin meeting-ah hian DC pahnihte pawm tlan thutlukna(resolutions)te chu:
1. Ramri-a remna leh muanna a awm theihna turin thawhhona tha tak nei chungin hmalakna kalpui nise tih a ni a. State pahnihte hian an mahni huam chhung ve ve ah buaina a awm lohna turin hmalak nise se tih a ni.
2. Mamit leh Karimganj District thuneitute hian Motor veivak te pangai taka an kal leh theihna turin leh, a bik takin Essential Commodies, LPG leh thil dang phurtute chu khawi lam ve ve atang pawha dodalna awm lova an kaltlang theih nan enpuia hmalak nise tih a ni bawk.
Mamit DC hian heng thutlukna point pahnih atan hian hming a sign a ni.
Tuna ram inchuh hi DC pahnihte hian an ram chhung anih thu an sawichhuak ve ve a, meeting minutes-ah hian Mamit DC thusawi zawng zawng hi thailan a ni lo a. Tin, Karimganj DC-in an ramchhunga sipai an dah thu a sawite pawh Mamit DC hian thiam takin a hnial thla zel a; kan ram chhungah hian kan sipaite hi Covid-19 avangin duty-in an awm thin a. Karimganj lamin kan ram chhungah thlam te halin, huan thlai te an ti chhia a, buaina hrang hrang an siam zui avangin sipai pawh dah belh a nih thu a tarlang bawk. Mizoram veng him tura Mizoram chhungah a sipai duty dah chu tun dinhmunah thil tul a nih thu a sawi bawk a ni. Karimganj DC hian Medili lei chu an siam a nih avangin an ta ni a a sawi pawh Mamit DC hian Medili Lei chu Assam siam ni mahse kan ram chhung a ni a, kan ram chhungah lei min rawn siamsak chu lawmawm a tih thuin a chhang a ni. Karimganj DC hian tuna Medili lei bula Mizoram sipai duty kan in dah mekna Forest Quarter chu Assam sawrkar sak niin a sawi a; hei hi Pu Lalbiakchama, Chawngthu DFO Kawrthah chuan thil hriat sual a nih thu sawiin kum 1985-a Mizoram Sawrkarin kan sak anih thu sawiin, Medili Lui kama Forest Plantation zawng zawng pawh hi kum 1983 leh kum 1984 a Mizoram Forest Department in kan siam vek a nih thu sawi a, chu chu Assam Forest official ho pawhin an hriat thu a tarlang bawk. Hei hi Karimganj DC leh Assam Forest official pawhin chhan ngaihna an hre lo a ni. Tin, Boundary rin fel thei turin thuneihna pawh DC pahnihte hian an level-ah hian an neilo tih an tarlang bawk.
Tuna ram in chuhna mek neitu diktak chu tuna awp mektu kan ram sipaite venhimna hnuaiah awm Mizote hi kan ni a. Chuvang in Mamit District Bawrhsap hian kan District-in kan awp chinah hian hnungtawlh kan tum lo a, Kan ram chhunga sipai kan dahna ah hian sawrkarin tul a tih chen chen kan awm dawn a ni tiin a sawi a ni.
Nimin Meeting chungchang Social Media hrang hranga darh thlirho-in vawiin khan Dr Lalrozama, IAS, District Bawrhsap hovin Sawrkar Officials, Khawtlang hruaitu, Political Party aiawh, Tlawmngai Pawl hrang hrang atangin District Thalai Pawl, MZP, MHIP, MUP leh thuthar thehdarhtute nen Mamit DC Conference Hall ah sawihona neih a ni.
