Tukin zinglam dar 3:30 vel khan Mamit Dinthar Venga In pali chhungkaw 6 in an luah lai chu a kang ral vek a. chhungkaw 1 tih loh chuan bungrua engmah an chuh hman lo a ni. A bul a in pakhat erawhchu kan kai hma in thiah hman a ni.

Tukinah inkang tih hriat a nih veleh hian vengchhung atangin inkang thelh tumin mi tlawmngai thahnem tak an pungkhawm nghal a, Inkang lai hi a nasat tawh em a vangin thelh thei a ni tawh lo a, a dang kang kai tur zel erawh chu ven hman a ni. Inkang hlut zawng hi cheng nuai 17 vel ni a chhut a ni.

Vawiin hian inkang pual Relief Committee din nghal niin kang tuarte chhawmdawlna tur hrang hrang ngaihtuah nghal a ni a. Mamit khawpui chhunga YMA Branch hrang hrangah tanpuina khawn nghal niin, tanpuina pawisa leh thildang thahnem tak a tling khawm nghal a ni.

Vawiin hian inkang pakhat Pi Lalsiami in hi hnatlang a sak nghal a ni a. A dangte erawhchu in neitute nena in berawnin insak that hna hi la chhunzawm leh tur a ni.

Relief Committee Chairman Pu V.L Remliana SDO (Sadar) hovin vawiin vek khan D.C Conference Hall-ah Committeee neih nghal a ni a, kangmei tuarte chhawmdawl dan tur awm thei ang ang te sawi ho nghal a ni a, In pakhat sak nan hian Rs 90,000/- a dung 28ft avang 18ft tura ruahman a ni. Chhawmdawlna hmasa atan mi pakhatah zelah Rs 1,000/- a pek tur ruahman a ni.

Mamit-a inkang tuarte tan hian Bialtu MLA Pu John Rotluangliana Deputy Speaker ni bawk chuan Rangva Bundle-4 theuh leh hnatlang te thingpui in nan Rs 5,000/- a pe a ni. Relief Committee Member -ah hian Mamit khawpui chhunga Head of Offices te, Tlawmngai Pawl hrang hrang hruaitute an tel a ni.