727/2026-2027

Dated : Mamit the 27th May of 2026: Vawiin khan Pi Vanlaldiki Sailo, Commissioner, Persons with Disabilities (PwD) chuan Mamit khawpui huamchhunga sawrkar hmunhma hrang hrang Mamit DC Office, District Hospital Mamit, Govt. Mamit College, Govt. Mamit High School, Govt. Mamit Higher Secondary School leh DPC Office, Samagra-te tlawhin, rualbanlote (vohbikte) tana awlsam zawka luh chhuah theihna (Access Audit) an siam dan te a hmunah a enfiah.

Pi Vanlaldiki Sailo, Commissioner chuan, vohbikte chuan ngaihsak an mamawh bik thu sawiin, Pianphunga rualbanlote'n pangngai taka nun an hman ve theih nan, a tulna apiangah kan tanpui a ngai a ni a ti. Vawiina fuke kim tha tak te pawh hi nakinah chuan ramtuileilova la awm thei reng kan nih thu a sawi a. Sawrkar laipui duh dan angin, sawrkar pisa-ah te, zirna inah te, Biak In leh vantlang mipui punkhawmna hmunah te rualbanlote (vohbikte) tana hman awlsam tur hmunhma kan buatsaih a tul hle a ni, a ti bawk.

Mizoramah pawh Office of the Commissioner, Persons with Disabilities hmalaknain ni 21 February, 2025 atang khan Access Audit hi neih tan a ni a. Mamit District chhung office endik bakah hian mizoram chhung district 10 ah he programme hi kalpui tawh niin, Mizoram pumpuiah endikna hi neih chhuah vek tum a ni.

Sawrkar laipui chuan India rama rualbanlote hamthatna tura a duan Accessible India Campaign hnuaiah Access Audit hi a ngai pawimawh em em a. Rualbanlote'n khawi hmun pawh harsa lova an thlen ve theih nan - wheelchair hmangte, mitdelte leh a dangte tan, mipui punkhawmna vantlang building hrang hrang, Biak In, sawrkar pisa, zirna in leh a dangte chu siam rem ngei ngei tur tiin khauh takin thupek a siam a. Hemi bawhzui hian Audit Team te leh rualbanlo aiawhte'n heng hmunte hi endikin hun an hmang thin a, India ram pumpuiah Access Audit hi chak taka kalpui mek a ni.

Vawiina Access Audit neihnaah hian rualbanlote'n khawilai hmun pawh awlsam taka an thlen theih nan wheelchair hman ngaihna hmunte, mitdelte tana braille tarna hmun siamte, mipui punkhawmna vantlang building hrang hranga an kalvelna tur te endik a ni a. Hmunhma buatsaih dan tur ruahmanna (drawing) hlan nghal an ni bawk. He Access Audit neihnaah hian Pi Lalrammuani Hnamte, SDC bakah Line Department aiawhte a tel a ni.