No.7543/2020-2021

Vawiin khan Dr. Lalrozama, IAS, Mamit District Bawrhsap chuan Bawngva khua tlawhin Aspirational District hnuaia khaw 11 tehfung hrang hranga hnufual bikte zirtirna leh inhrilhhriatna Public Meeting leh Awareness Campaign Programme a nei.

Bawngva GSK Hall-a Public Meeting-ah thu sawiin Mamit Bawrhsap chuan hmasawnna hi vawilehkhata awm a ni lova, zawi zawia hmasawnna leh hmathlir nei chunga ruahmanna siam ngai a ni a ti. Pa berin a nupui leh fanaute a mawhphurna-ah neiin chutiang bawkin nuho pawhin kan fate hriselna kawngah mawhphurhna lian tak kan nei tih inhria-in a hun taka vaccine laktir te, damdawi in leh Health worker te hnuaiah ngei nau nei thin turin a chah a. Pa hovin hri danna lak kawngah an nupuite tawiawm tha vek turin a chah bawk. Hmasawn tur chuan hriselna a ngai a, kan fate Anganwadi a in-register a, nutrition an sem thin pawh a hun tak leh a nihna ang taka eitir thin tura chahin nu naupai reng reng chu Sub Centre-ah thla thum chhungin in-register ngei thin turin a chah bawk a ni.

He hunah hian Health Department, Education Department, ICDS, DLCW(MSK) leh MRB Mamit Manager te'n zirtirna hrang hrang pein Health Department hnuaiah Damdawi ina nau nei tan Rs. 700/- nuin a dawng thin a. Hei bakah hian Rs. 800/- thleng nau nei tura an veivahna senso an tum thin thu tarlan a ni. MRB, Mamit Branch pawhin Financial Literacy chungchangah zirtirna pein Loan pek tlak ni tur chuan Bank Account an neih a tul a, Kuhva huan siamna loan te, vawk vulh loan te Bank kaltlanga pek theih reng an nih thu tarlangin vawiinah hian Account hawng duh te tan pawh a hawn theih nghal dawn bakah Insurance Scheme hrang hrang a tih theih nghal a, ATM Card dilna pawh Bawngva khaw mipuite tan hian tihsak nghal an ni bawk. Puitling ziak leh chhiar thiamlo mi 114 te chu zirtirtu mi 8 te'n ziak leh chhiar zirtir mekin an hmalakna tlangpui report ngaihthlak a ni bawk.

Mamit District Bawrhsap hian Bawngva khua-a Anganwadi Centre tlawhin VC Member, Health Worker, Anganwadi Worker bakah ASHA te inkarah thawhhona tha a awm theih nan DC hovin inkawmhona neih a ni a. Kalkhawmte atangin zawhna leh chhanna hun tha tak hman nghal a ni bawk.

He hun hi Pu Lalramthara, VCP, Bawngva chuan kaihruaiin District Bawrhsap hi CMO, DEO, DPO( ICDS) aiawh DIPRO Mamit bakah thutharthehdarhtute'n an tawiawm a ni.