1935/2025-2026

Dated Mamit the 15th of October, 2025 : Vawiin tlai dar 7 khan DC Conference Hall, Mamit-ah All NGO, Commercial Vehicle Owner Association te leh PWD thuneitute Pu K.Laltlawmlova, District Bawrhsap hovin an thukhawm.

Thutkhawmah hian All NGO hruaitute leh Commercial Vehicle Owners Association hruaitute chuan Mamit khawpui leh District chhung khaw dang te'n harsatna an neih dan chipchiar taka sawiin, Mamit ah petrol leh diesel a awm loh thute, damlohna vanga hmunpui zawk pan ngaite tan harsatna nasa tak a thlen thu an tarlang a, tun dinhmunah blacktop mam han beisei theih a nih loh thute leh a theih ang ang a siam erawh an phut thu sawiin, tuna kan kawng dinhmun chu a chhiat em avangin, kawngpui dan avanga mipuite harsatna tawh tur pawh ngaipawimawh theilo a, dan chah tum an nih thu an sawi a.

Pu H. Zoramliana Engineer in Chief, PWD chuan National Highway kawngah Mizoram PWD te'n thuneihna pum hlum an neiloh thu sawiin mipuiin harsatna nasa tak an tawk tih a hriatpui thu a sawi a,kawngpui hial dan tum a ni chu a hriatthiam pui thu leh tihawm tak pawh a nih thu a sawi a, kawngpui dan tuma hmalakna chu a thlawn loh ngei a beisei thu sawiin, Naktuk ni 16th October, 2025 atangin kawngpui thawmthat hna chu chak zawka hmalak a ni dawn a ni a ti.

NH 44A kawng maintain nan crore 11 hmuh a ni a, kawng hlui maintain na tur pawisa pawh hmuh a nih thu leh NH 44A kawng siamna tur crore 170 pawh sanction fel ni tawhin, Sawrkar Laipuiah chak zawka kalpui a nih theihna turin nawr mek zel a nih thu a sawi a. E in C chuan mipui tana harsatna siam lo a, kawngpui dan chu titawp a hmalakna ngaichang turin a ngen a, kawngpui thawmthat hna thawh a nih chhung hian ruahmanna tha zawk siam chungin PWD thuneitute CE, SE leh EE te'n kartin tlawh tura ruahmanna pawh siam a nih dawn thu a sawi bawk.

Pu H.Zoramliana chuan kan ramchhunga National Highway kawngte thawmthat leh siamthat hna thawhna turin Sawrkar Laipuiah theihtawpa Mizoram Sawrkarin hma a lak thu leh a nawr reng thu sawiin, duh anga hmalakna a chak theih bik loh dan hrang hrangte a tarlang tel bawk a ni.

Kawngpui dan chungchang thutkhawmah hian PWD lama thuneitute leh Officials te a tel.

Mamit District chhung kawngpui dan tum chungchangah hian All NGO, Commercial Vehicle Owner Association hruaitute hian zanin hian PWD thuneitute nena an inbiakna thu ngaihtuah leh tur hian meeting an nei zui leh nghal dawn a ni.