Vawiin khan DC Conference Hall, Mamit-ah District Development Co-Ordination & Monitoring Committee (DISHA) chu an Chairman Pu C.L.Ruala, MP Lok Sabha hovin an thukhawm a. Mamit District chhunga hmasawnna hna thawh hrang hrangte thlirho a ni.
Meeting-ah hian Central Schemes hrang hrang MGNREGS, PMAY, PMKSY, DDUGY, NSAP, NRDWP, SBM(G), BADP, MDM/SSA, RMSA/DEO hnuaia hmalakna leh hmasawnnate thlirho a ni a. 2016-2017 chhungin MGNREGS hnuaia Block tinah Ni 35 theuh inhlawhna siam niin, Job Card 20705 pekchhuah a ni a. Pradhan Mantri Awas Yojana (PMAY) hnuaiah kum 2016-2017 chhungin In 391 beneficiary thlan a ni a, pawisafai cheng 130,000 dawng tura tarlan a ni. National Social Assistance Programme (NSAP) hnuaia Integrated Child Development Scheme (ICDS) Project hrang hrang thlirho a ni a, Indra Gandhi National Old Age Pension Scheme (IGNOAPS), Indra Gandhi National Widow Pension Scheme (IGNWPS), Indra Gandhi National Disable Pension Scheme (IGNDPS) leh National Family Benefit Scheme (NFBS) khaw hrang hranga Beneficiary te dinhmun meeting-ah thlirho a ni bawk. Rualkhai taka khawtinin an dawn theih nan beneficiary-te ennawn leh ni se tih a ni.
National Health Mission hnuaia Mamit District dinhmun thlirho niin an hmalakna hrang hrang Meeting-ah hian tarlan a ni a. Kum 2016-17 chhungin Mamit District chhungah Malaria vanga nunna chan mi 1 chauh an awm chu hmasawnna a nih thu tarlan a nih bakah Sikul naupang, mit lama harsatna neite hnenah Tarmit 78 semchhuah a ni a. Revised National Tuberculosis Control Programme (RNTCP) hnuaiah TB vei za zela 97 tihdam an nih thu tarlan a nih bakah thisen test mi 803 zinga mi 12 ah HIV hrik hmuh a ni a, HIV hrik kaichhan lianber chu Mipat hmeichhiatna a nih thu tarlan a ni bawk.
Pradhan Mantri Gram Sadak Yojana (PMKSY) hnuaiah Mamit-Phaizau kawng sial tura hmalak mek niin tendering zawhfel a ni tawh a, W.Phaileng-Damparengpui kawng chu zawhfel tawh a nih thu tarlan a ni bawk.
Kum 2016-17 chhunga Border Area Development Programme (BADP) hnuaia Mamit District chhunga RD Block 2 te hmalakna leh hnathawh tlangpui thlirho niin tan la sauh sauh turin meeting chuan a ti bawk.
Sarva Shiksha Abhiyan (SSA) hnuaia hmalakna hrang hrang tarlan niin a thlawna School Uniform leh lehkhabu sem dan thlirho a ni a. Mid Day Meal Scheme hnuaia harsatna hrang hrang tawh thinte sutkian dan tur sawiho bawk a ni.
Meeting-ah hian Pu V.L.Robiaka, MLA, Dampa Constituency & Chairman ZIDCO, Pu Lalrinmawia Ralte, MLA, Hachhek Constituency, Pi Lalbiaksangi, District Bawrhsap bakah Committee Members-te an tel tha hle a ni.
