No.898/2021-2022

Mamit 10th June, 2021 : Ministry of Health & Family Welfare (MoH&FW) hnen atangin Mamit District Hospital chuan May Ni 10, 2021 khan LaQshya National Certificate a dawng.

He Certificate hian Mamit District Hospital chu India rama Labour Room (Nu nau neihna) quality tha chungchuang a ni tih nemnghetin India ram puma District Hospital tlemte zingah hetiang chawimawina dawng thei a ni.

He endikna-ah hian National Quality Assurance Standard (NQAS) hnuaiah National External Assessor-in tehfung khauh tak tak hmanga endik niin March Ni 30, 2021 khan National Assessment neih a ni a. Hospital nau neihna kaihhnawih checklist khirh leh chipchiar tak tak hmanga endik anih bakah check points 300 hmanga endik a ni bawk.

Nau neihna (Delivery Room) quality tha National Certificate dawng tur hian a hniam berah Score 70% chin hmuh a ngai a, score hmuh tam dan azirin hetiang hian then hran leh a ni.

Silver Certification : 70-79%
Gold Certification : 80-89%
Platinum Certification : 90% leh a chunglam.

He endikna-ah hian Mamit District Hospital Labour Room chuan 93% hmuin, Certificate awm thei sang ber LaQshya National Quality Assurance Standard Platinum Badge a hmu pha a ni.

Mamit District chu Aspirational District anih angin hmasawn turin kawng hrang hrangin hmalak reng a ni a. CSR Project kaltlangin Labour Room, District Hospital Building sak thatna sum leh hospital mamawh bungrua leh hmanrua thahnem tak hmuh a ni a. CSR tanpuina vekin Mamit District chhunga thingtlang damdawi In leh Sub Centre te mamawh hmanrua, damdawi leh damdawi In mamawh lirthei thahnem tak pekchhuah a lo ni tawh bawk a ni.

Dr. Lalrozama, IAS, Mamit District Bawrhsap chuan National Certificate kan dawn theih nana theihtawpchhuahtu, State Sorkar hotute, DMS, CMO, District Hospital Staff te leh District chhunga Health Department-a thawktu zawng zawngte chungah Mamit District aiawhin lawmthu a sawi a ni.