Mamit District Open Tennis Tournament vawi 3-na chu vawiin khan Mamit Tennis Court ah tan a ni, Pu Lalnunmawia MPS, SP Mamit chuan a hawng.

Pu Lalnunmawia chuan Tennis hi mizo ten kan la hmelhriat thuk lutuk lo a, khawvel huapa infiamna langsar leh eizawnna tlak a ni a ti a, Mizo thalaite hian tihtak zeta kan beih a, kan luhchilh chuan kan thiam lohna leh kan hniamna bik tur a awm lo a ni a ti. Infiam mi tha tak ni tur chuan ruitheih thila kan fihlim a ngai a, insum theihna leh mahni in rintawkna nei chunga bei turin tournament-a tel infiammi te a chah a ni.

He tournament ah hian District chhung atangin mi 30 an tel a, Category hrang hrangah then niin Men’s Singles ah 12, Men’s Doubles ah 6 pair, Boys under 15 ah 8 leh Girls under 15 ah mi 4 te an tel a ni. Tournament hi ni 25 ah zawh a ni ang.