1563/2023-2024

Mamit 18th August, 2023 : Vawiin khan DC Conference Hall, Mamit-ah Pu VL Remliana, Chairman District TB Forum/ District Bawrhsap kaihhruaina-in District TB Forum thutkhawm a ni.

Vawiin thutkhawmah hian Mamit District chhunga TB veite enkawlna kawngah hmalakna hrang hrangte thlirho-a sawihona neih a ni a. TB vei te tana donors mi 24 te chungah District Forum chuan lawmthu sawiin, Nikshay Mitra hnuaia, TB veite enkawlna kawnga in pe tura ngenna, Head of Offices-te hnenah pek nise tih a ni a, Piramal Foundation te'n TB dona kawnga an hmalakna tawiawm turin, District chhung khaw hrang hranga Self Help Group-te hnenah ngenna pek nise tih a ni bawk. Dr. Lalnuntluangi Khiangte, Member Secretary, District TB Forum/SMO, Mamit-in kumin Jan-July report a tarlan danin TB vei leh vei loh test mi 394 an awm a, hetah hian TB hrik kai mi 39 hmuhchhuah an ni. TB hrik kai mi 39 atang hian mi 4 te chu HIV positive kai tel an ni bawk.

Nikum 2022 report a lan danin TB vei enkawl atanga a hlawhtlinna hmuh hi 90% a ni a. TB vei te'n ei tur tha zawk an hmuh theih nana thilpek petu, mi tlawmngai (Nikshay Mitra registered) hi Mamit District chhungah mi 24 an awm a, heta tang hian TB vei mi 25 te thlatin eitur tha/ thei te pek thin an ni. Nikshay Mitra hnuaia in-registered te hian thlakhatah Rs.700/- an thawh thin a ni. Pu VL Hmangaihkima, Senior TB Laboratory Supervisor-in Nikshay Mitra chungchang sawizauna neiin, TB veite'n eitur tha zawk an dawn theih nana mi tlawmngai te'n thilpek an pek hmangin TB veite hnenah eitur hrisel pek thin an ni a, hei hian TB vei enkawlna kawngah nasa taka a puih thu leh damlo damdawi ei mekte pawhin hmasawnna an hmuh phah thu ngaihthlak a ni.

Meeting-ah hian Mamit District chhunga Piramal Foundation atangin TB umbo tur leh a veite enkawlna kawnga hma an lak dan a lem nen tarlan a ni a. Mamit District chhungah TB Free Village siam a nih theihna tura khawtlang hruaitute thawhpuina leh thlawpna a ngaih thu tarlan tel a ni bawk. Vawiin thutkhawmah hian District TB Forum, Mamit te an tel a ni.