Vawiin khan Mamit District Treasury Office Building thar chu luah theiin Pu Lalsawta Finance Minister chuan a hawng. 

Hawnna thusawiin Pu Lalsawta,  Minister chuan Mamit District Treasury Office luah theia sak zawh a nita chu lawmawm a tih thusawiin thawktute chu Office building thar a nih angin rilru thara pu a, anmahni dawrtu mipui leh sorkar Department  hrang hrangte hawihhhawm taka lo dawngsawng thin turin a chah a, vawiina chinfel theih rengte hna khek lo a chingfel ngal zung zung tur leh kan rawngbawlna hmun a ni tih hria-a theihtawp chhuah a thawk turin a chah a ni. 

Finance Minister hian India ramin kum 70 chuang kan lo hman tawh chhiahlak dan chu thlakin chhiahlak dan thar GST chu ni 1 July atanga hman tan turin ni 30 June zanlaiah India President chuan a tlangzarh dawn a, he dan thar hi Mizoram mipuite pawhin kan hlawkpui zawk leh kan thatna tur a nih a beisei thusawiin dik tak leh a   hun taka sorkara chhiah lut tur zawng zawngte pek a nih theih tawh dawn thu a sawi bawk. 

Pu Lalthanzuala Ralte Sr EE , PWD Project Division II in report a pek danin Mamit Treasury Office hi cheng nuai 142.34 senga sak a ni a, a sak hna hi ni 10 February 2015 ah tan niin ni 30 May 2016 ah sak zawh a ni a, ni 6 June, 2017 ah luah theia peih niin Department kuta hlan a ni. Building floor area zauzawng hi 393.60 sqm a ni a, ground floor ah hian Treasury Officer Room, Bill Section, Pension section, Establishment, Dustry Room, Computer Room leh Waiting Hall awmin a hnuailamah  Compilation Section, Record Room, Store bakah Chowkider quarter a chhawm tel bawk a ni. He building sak hna kalpui naah hian hmanraw changkang leh tha ber bera thuam niin National Building code For Persons with Disabilities in a phut angin rualban lote tana inthiarna hmun turte siam a ni bawk. 

Mamit Treasury ah hian thawktu Treasury Officer 1, Accountant 1, Assistant Treasury Accountant 5, LDC 1, Technical Staff 1, IV Grade 2 leh MR pakhat te awmin Mamit District chhunga DDO 50 leh Pensioners 400 an vilin an enkawl a ni. 

Office Building hawnna inkhawm hi Pu Lalmalsawma MF& AS Secretary Finance, chuan kaihruaiin Pi Lalbiaksangi District Bawrhsap chuan in lawmna thu a sawi a, Mamit khawpui chhunga Officer Club, Tlawmngai pawl hrang hrang atangin mipui tha hnem tak an tel a ni.