No.2250/2020-2020  

Mamit 20th June, 2020 : Vawiin khan Fisheries Department hnuaia Mamit District chhunga khaw pasarih, Saikhawthlir, Chuhvel, Kananthar, Sihthiang, Rengdil, Zamuang leh Kawrthah khua-a Sangha chi sem tura ruahman Nuai 2 chu Dr. Lalrozama, IAS, Mamit District Bawrhsap, Fisheries Department Mamit leh Sangha chi Supplier MIFMA te chuan Saikhawthlir khua-a an endik hnu-ah Reject a ni.

Pi C. Lallianpuii, DFDO, Mamit chuan Sangha chi chu a len zawng 60 mm atanga 80 mm tur anih thu sawiin tuna an rawn ken chu a te lutuk a, kan District Sangha thar chhuahna kawnga kan intodelhna tura harsatna a awm theih dawn avanga Sangha chi rawn kengtute hian Department Supply Order ang Size an rawn tih thlen loh avanga Reject an nih thu a sawi.

Sangha chi lo thleng te hi a tet avangin Nursery-ah Oil Cake-in Ni 25 vel vulh leh phawt a ngai dawn a. Hei vang hian Saikhawthlir khua-a Sangha khawitute chuan an khua-ah a enkawlna tur ber Oil Cake a harsat avangin Sangha chi-te chu lak an hreh thu an sawi bawk a ni.

Saikhawthlir khua-ah hian Sangha chi Supplier tura an thlan Mizoram Fish Farmers, Animal Husbandry and Dairy Producers & Marketing Association (MIFMA) hruaitute pawhin telpuiin Sangha chi-te chu a hmun ngeia kalchilh a, duhthlan ngei chu an tih thin dan leh duhthusam a nih laiin hrileng mek avanga Lockdown kalpui anih avangin phaia mahni ngei kal a, duh thlan theih a nih loh thu leh Sangha chi chah luh hrim hrim pawh tun boruakah chuan a harsat thu an sawi ve bawk a ni.

Sangha chi hi phai atanga supplier te'n an chah a ni a. An Order ang leh an duhthusam ang ngei a lo thlen loh avangin pawi an ti hle a. An Sangha chi chah ang a lo thlen loh avang hian  phaia an Agent-te nen an inremna hi an titawp nghal a ni.