Mizoram State  Sanitation Task Force hnuaia khawpui fai thlan tur atana inbuatsaihna chuan a vawrtawp thleng chho mekin  Mamit khawpui chuan khawpui fai ber nih tumin hma a la zel a. Tukin khan Pi Lalbiaksangi District Bawrhsap hovin khawpui chhung veng hrang hranga hmalaknate leh duhkhawp lohnate a hmunah enfiah leh a ni.

Khawpui fai thlanna turah Mamit khawpui thlan a nih ve ngei theihna tur hian kawng hrang hranga hmalakna-ah theihtawp chhuah chhoh mek a ni a. Village council hrang hrangte chuan an huam chhung theuhah vantlang hnatlang hi veng chhung dinhmun a zirin huaihawt thin a ni. Vengtinin vantlang hnatlangpui vawi tam tak an nei tawh a ni. Hetih lai hian Sorkar Department hrang hrangte chuan office leh a chhehvel tifaiin hnatlang an lo nei tawh bawk a ni. Chhungtin, kohhran leh NGO hrang hrangte pawhin he inelna tur hian hma an la chhoh  mek zel a  ni.

Tukina veng hrang hrang endik tur hian team hrang pathum a inthendarh thin kha a huhovin an infinkhawm a. Vengtinte chu fai tehna hrang hrang atanga tehin bawlhhlawh paih dante, pawnlera inthiar awm leh awm loh te,  vantlang hmuna bawlhhlawh bawm awm leh awm loh te, faina lamhawi thuziak tar (hoardings) a awm leh awm loh bakah tuiluankawr thlengin endik vek a ni.

Tukina a huho a veng hrang hrang endiknaah hian SP Mamit, Addl.DC, Addl.SP, DIPRO, SDC, DLAO, AO, DRDA, President MDVCA, President Sub Hqrs YMA bakah President Jt.VC Mamit te an tel a ni.

 

 

Attachment

  • Loading attachment...