Vawiin khan I&PR Conference Hall Mamitah Communication and Capacity Development Unit (CCDU), PHED buatsaihin Training On Grassroot Level On Water Quality Monitoring and Survaillance Programme hman a ni a. He hun hi Pi Lalbiaksangi, District Bawrhsap chuan khuallian niin a hmanpui a, Training hawnna a nei nghal a ni.

Khuallian chuan thu sawiin PHE Department chu mi thiam fuk khawmna an nih avangin nasa lehzuala mipui rawngbawlsak tur leh midang tan malsawmna ni turin a sawm a. Kalkhawm mipuite chu lo neih bansan tura chahin lo/leipui nei lo thei lo kan nih pawhin hal hma a meikawng tha taka sial turin a chah a. Ramngaw vawnhim a tul thu sawiin tuihna siamtu chu thing leh mau a nih avangin thingphun kan uar deuh deuh a tul a ni a ti.

Pu Lalropuia Hmar, Executive Engineer, Mamit WATSAN Division pawhin vantlang tui lak chungchanga khawtlang mawhphurhna sawiin mi tinte ramngaw tichereu lo turin kan inenlet a ngai a. Ruam khawkrawk, lo neihna atan pawha hlawk vak lo tur ang chi chu vat lo hram ila, kan ramngaw neihsa te humhalhtu nih tum tlat ang u a ti. Water Resource awmna GPS hmangin Sorkarin a chhinchhiah zel thu sawiin Water Infrustructure enkawlna-a mawhphurtu chu Benificiary te an ni a ti a. Kan tui tlan a thianghlim tur a ni a, a thianghlim leh thianghlim loh-ah khawtlang hruaitute pawhin nasa takin mawhphurhna kan nei a ni a ti.

Dr.Lalremsanga Varte pawhin tui thianghlim leh khawtlang hriselna inkungkaih dan chungchang a sawi a. Pu.R.Lalnghakliana Senior Chemist-in tui quality endik leh vil zui dan chungchang sawiin Pu P.C Zohmingliana, Bacteriologist chuan tui sample lak chungchangah zirtirna a pe a, zawhna leh chhanna hun hman a ni bawk.

Vawiin Training hi Pu R.Lalnghakliana, Senior Chemist in kaihruaiin Mamit khawpui chhung bakah a chhehvel khua Bawngva, Darlak, Dampui, Dapchhuah, N.Sabual khua atanga khawtlang hruaitute leh tlawmngai pawl hruaitute an tel a ni.